Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 431 Hüküm no: 480 Orijinal metin no: [69b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Bey’in İsmail b. Musa Çavuş’a Sivas’ın Tarhanapınarı mahallesindeki evinin bir kısmını hibe edip kalanını da sattığı Anadolu’dan menzil mübâya‘ası lâkin ıskāt-ı şüf‘a içün şefî‘ tarafından bir mikdâr mahâllini hibe ve mâ‘adâ mahâllini bey‘ ü temlik ve mahâllinde kabza taslît Vilâyet-i Anadolu’da medîne-i Sivas’da Menzilhâne kurbünde Tarhana Pınarı mahallesi ahâlisinden olup mahmiye-i İslâmbol’da müsâfiren sâkin Mahmud Bey b. Ahmed nâm kimesne meclis-i şer‘-i şerîf-i enverde yine mârrü’z-zikr Tarhana Pınarı mahallesi ahâlisinden işbu bâ‘isü’l-kitâb es-Seyyid İsmail b. Musa Çavuş nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Seyyid Mustafa menzili ve bir tarafdan Dek? Ömer Bey menzili ve iki tarafdan tarîk-i âm ile mahdûd ve tahtânî iki bâb oda ve bir mikdâr havlu ve müştemilât-ı sâireyi hâvî bir bâb mülk menzilimin zikr olunan Seyyid Mustafa tarafından kırk zirâ‘ ve Dek? Ömer Bey tarafından kırk zirâ‘ ki cem‘an seksen zirâ‘ mahâllini hibe-i sahîha-i şer‘iye ile mezbûr es-Seyyid İsmail’e hibe ve temlik ve mahâllinde kabza taslît ve mâ‘adâ mahâllini ebniye-i mezkûresiyle tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr es-Seyyid İsmail’e yüz yirmi guruşa bey‘ ve temlik ve mahâllinde kabza taslît eylediğimde ol dahi ber-vech-i muharrer ittihâb ve iştirâ ve temellük ve kabûl eyledikden sonra semeni olan meblağ-ı mezbûr yüz yirmi guruşu mezbûr es-Seyyid İsmail yedinden tamamen ahz ü kabz eyledim, ba‘de’l-yevm menzil-i mahdûd-ı mezkûrun zikr olunan seksen zirâ‘ mahâlli mezbûr es-Seyyid İsmail’in mülk-i mevhûbu ve mâ‘adâ mahâlli ebniye-i mezkûresiyle mülk-i müşterâsı ve hakk-ı sarfı olup benim kat‘a alâka ve medhalim kalmamışdır, mahâllinde mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 5 C sene 1197 Şühûdü’l-hâl: Es-Seyyid Osman b. es-Seyyid Ömer, Osman Çavuş oğlu Memiş, Ömer Beşe b. Mehmed, İbrahim Efendi yazıcı, Musli Beşe b. ( ), Tekyenişînoğlu İbrahim Bey ve gayruhum.