Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 433 Hüküm no: 483 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin Cafer mahallesindeki evini Zaim Hasan, Hüseyin Ağa ve Ümmügülsüm Hatun’a sattığı Menzil mübâya‘ası 4 sehmin bir sehmini birine ve bir sehmini dahi birine ve iki sehmini birine Mahmiye-i İslâmbol’da Şehremîni kurbünde Ereğli mahallesinde sâkin müderrisîn-i kirâm-ı zevi’l-ihtirâmdan Abdullah Efendi b. el-mevlâ el-merhûm Hafız İbrahim Efendi meclis-i şer‘-i hatîr-i lâzımü’t-tevkīrde işbu ashâbü’l-kitâb kendi nefsinden asîl ve li-ebeveyn er karındaşı Hüseyin Ağa b. Ebîbekir ile hâlâ zevcesi Ümmügülsüm Hatun bt. el-Hâc Ahmed taraflarından husûs-ı âti’l-beyânı tasdîka vekîlleri olduğu ber-nehc-i şer‘î sâbit olan Za‘îm Hasan Ağa b. el-mezbûr Ebîbekir mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye irsen yedimde mülk ve hakkım olup mahmiye-i mezbûrede Cafer Ağa mahallesinde vâki‘ bir tarafdan el-Hâc Halil veresesi menzili ve bir tarafdan es-Seyyid el-Hâc Ali menzili ve tarafeyni tarîk-i âm ile mahdûd hâriciyede tabaka-i ulyâm iki bâb oda ve dîvânhâne ve dehliz ve vustâda iki bâb oda ve dîvânhâne ve dehliz ve kilâr ve kenîf ve süflâda bir ahur ve samanhânede ve bir arpa anbarı ve kenîf ve bi’r-i mâ ve üç bâb dekâkin ve dâhiliyede tabaka-i ulyâda iki bâb oda ve sofa ve bir cihânnümâ ve vustâda iki bâb oda ve bir sofa ve tahtapûş ve bir mâ-beyn odası ve bir havuz ve kenîf ve süflâda bir matbah ve bir hamam ve bi’r-i mâ ve bağçeyi müştemil bir bâb mülk menzilimin dört sehm i‘tibârıyla birer sehmden iki sehm-i şâyi‘lerini vekîl-i mezbûr Za‘îm Hasan Ağa ile karındaşı müvekkil-i mezbûr Hüseyin Ağa’ya ve iki sehm-i şâyi‘ini dahi vekîlim mezbûrun zevcesi müvekkile-i mezbûre Ümmügülsüm Hatun’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile dört bin üç yüz guruşa bey‘ ve temlik ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dört bin üç yüz guruşu mezbûr Za‘îm Hasan ile müvekkilân-ı mezbûrân Hüseyin Ağa ve Ümmügülsüm Hatun yedlerinden tamamen ahz ü kabz eyledim ba‘de’l-yevm menzil-i mahdûd-ı mezkûrun i‘tibâr-ı mezkûr üzere birer sehmden iki sehm-i şâyi‘leri mezbûrân Hasan Ağa ve Hüseyin Ağa ve iki sehm-i şâyi‘i dahi müvekkile-i mezbûre Ümmügülsüm Hatun’un mülk-i müşterâları ve hakk-ı sarfları olup benim kat‘a medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 5 min-C sene 1197 Şühûdü’l-hâl: İsmail Efendi b. Süleyman, Hüseyin Ağa b. Yusuf, Hasan Ağa b. Ali, Süleyman b. İbrahim, Mehmed Ağa b. el-Hâc Ali, el-Hâc Mehmed Ağa b. Abdullah, Molla Ali b. Halil.