Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 448 Hüküm no: 501 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap İlyas mahallesinden Hafize Hatun’un tasarrufundaki evin yarısı kocası Osman Ağa’ya sattığı Nısf arsa mübâya‘ası Mahmiye-i İslâmbol’da Kasab İlyas mahallesinde sâkine ve zâtı vech-i şer‘î üzere mu‘arrefe olan Hafize Hatun bt. Abdullah meclis-i şer‘-i şerîf-i enverde hâlâ zevci işbu bâ‘isü’l-kitâb Osman Ağa b. Osman nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Çıkı Mehmed arsası ve bir tarafdan Derviş Ahmed Ağa arsası ve bir tarafdan Mustafa Bey bostanı ve bir tarafdan tarîk-i âm ile mahdûd bir bi’r-i mâyı müştemil bir bâb muhterik mülk menzil arsasının nısf-ı şâyi‘ini yedimde ba‘de’l-ibkā ve nısf-ı şâyi‘-i âharını tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem Osman Ağa’ya elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr elli guruş mutâlebesinden zevcim mezbûr Osman Ağa’nın zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm arsa-i mahdûde-i mezkûrenin nısf-ı şâyi‘inde benim kat‘a alâka ve medhalim kalmayıp zevcim mezbûr Osman Ağa’nın mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î. Fî 14 min-C sene 1197 Şühûdü’l-hâl: Hafız el-Hâc Mehmed Efendi imâm-ı mahalle-i mezbûre, Hatîb Hasan Efendi, es-Seyyid Osman Ağa b. es-Seyyid Mehmed, Mustafa b. Mustafa, es-Seyyid Ahmed Ağa b. es-Seyyid Halil, es-Seyyid Mustafa b. el-Hâc Hasan ve gayruhum.