Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 447 Hüküm no: 500 Orijinal metin no: [72b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Hatun mahallesinden annesi vefat etmiş olan Şerif Havva adlı küçük kıza nafaka tayini Nafaka, sagīre ceddesi babası üzerine takdîr Mahmiye-i İslâmbol’da Hacce Hatun mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Hadice bt. Süleyman nâm hatun meclis-i şer‘-i şerîf-i enverde dâmâdı es-Seyyid Osman b. Osman nâm kimesne mahzarında takrîr-i kelâm ve ifâde-i merâm edip dâmâdım mezbûr es-Seyyid Osman’ın firâşından hâsıla ve bundan akdem fevt olan sadriye kızım Zeliha bt. Halil nâm hatundan mütevellide hâlâ bi-hakkı’l-hıdâne hacr u terbiyemde olan Şerife Havva nâm sagīrenin mâlı olmayıp nafaka ve kisveye ihtiyâcı olmağla sagīre-i mezbûrenin nafaka ve kisve-bahâsı içün babası mezbûr es-Seyyid Osman üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin ber-vech-i muharrer nafaka ve kisve-bahâsı içün babası mezbûr es-Seyyid Osman üzerine bi’t-terâzî târih-i kitâbdan küllü yevm sekizer akçe farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-iktizâ istidâneye ve inde’z-zafer babası mezbûr es-Seyyid Osman üzerine rücû‘a ceddesi ve hâzınası mezbûre Hadice Hatun’a izin vermeğin mâ-vaka‘a. Fî 12 min-C sene 1197 Şühûdü’l-hâl: Molla Ali b. Halil, Salih b. Halil, Mustafa b. Mustafa, Hacı Hasan b. Osman ve gayruhum.