Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 449 Hüküm no: 503 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Saliha bt. Abdullah’ın ev arsasını kocasına sattığı Arsa mübâya‘ası Mahmiye-i İslâmbol’da Uzun Yusuf mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Saliha bt. Abdullah nâm hatun meclis-i şer‘-i şerîf-i enverde hâlâ zevci işbu bâ‘isü’l-kitâb es-Seyyid Osman Ağa b. es-Seyyid Ali nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Balaban Ağa mahallesinde vâki‘ bir tarafdan paçacı dükkânı ve bir tarafdan südcü kârhânesi ve bir tarafdan yeniçeri odaları cidârı ve bir tarafdan tarîk-i âm ile mahdûd bir bi’r-i mâyı müştemil bir bâb mülk menzil arsamı târih-i kitâbdan beş ay mukaddem tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile zevcim mezbûr Osman Ağa’ya iki yüz guruşa bey‘ ve temlik ve teslîm eylediğimde ol dahi zevcim mezbûr es-Seyyid Osman’ın zimmetini ibrâ ve ıskāt eylediğimde ol dahi ibrâmı kabûl etmeğin ol-vechile arsa-i mahdûde-i mezkûre târih-i mezbûrdan beri zevcim mezbûr es-Seyyid Osman’ın mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 14 min-C sene 1197 Şühûdü’l-hâl: İsmail Efendi b. el-Hâc Mustafa, Mehmed Emin Ağa b. Hasan, es-Seyyid Mehmed Emin Efendi b. Abdullah, el-Hâc Ali Ağa b. İbrahim topçu çırağı, Veliyüddin Efendi b. Mustafa, Mehmed Efendi b. Abdullah, Molla Ali b. Halil, es-Seyyid Ali b. Halil, el-Hâc Hasan b. Osman, Salih b. Halil.