Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 449 Hüküm no: 504 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Abdullah’ın mehrini kocasına hibe edip ayrıca bazı eşyalarını sattığı ve iki vakıf evdeki haklarını da ferağ ettiği Eşyâ mübâya‘ası ve mehrini hibe ve vakıf menzilini ferâğ ve bedelinden ibrâ Kezâlik takrîr-i kelâm edip zevcim mezbûr es-Seyyid Osman zimmetinde ma‘kūdun-aleyh olan elli guruş mehr-i müeccelimin on guruşunu yedinde ba‘de’l-ibkā mâ‘adâ kırk guruş mehr-i müeccelimi târih-i kitâbdan üç ay mukaddem hibetü’d-deyn mimmen aleyhi’d-deyn sahîhatün fehvâsınca zevcim mezbûra hibe ve temlik eylediğimde ol dahi târih-i mezbûrda ber-vech-i muharrer bilâ-mâni‘ ittihâb ve temellük ve kabûl eyledikden sonra zevcim mezbûr es-Seyyid Osman ile mahalle-i mezbûrede sâkinler olduğumuz menzil derûnunda benim yedimde mâlım ve mülküm ancak kıtık memlû sekiz köhne yasdık ve üç minder ve üç baş yasdığı ve iki çit mak‘ad ve iki yemeni yorgan ma‘a çârşeb ve bir orta keçesi ve iki Şam alacası entari ve bir kemhâ hırka ve bir çuka ferâce ve bir yaşmak ma‘a makrame ve altı sahan ma‘a kapak ve bir şorba tası ve bir sini ve üç tencere ve bâ-kapak ve bir leğen ma‘a ibrik ve bir güğüm ve bir sagīr kazgana münhasıra olup bunlardan mâ‘adâ menzil-i mezkûrda mevcûde bi’l-cümle melbûsât ve mefrûşât ve evân-ı nühâsiye ve gayr-ı nühâsiye zevcem mezbûrun mâlı ve mülkü olup benim kat‘a alâka ve medhalim olmamağla ben eşyâ-i muharrere-i mezkûremi dahi tarafeynden îcâb ve kabûlü hâvî bey‘-i bâtt-ı sahîh-i şer‘î ile ve safka-i vâhide ile yine târih-i mezbûrda zevcim mezbûr es-Seyyid Osman’a otuz guruşa bey‘ ve temlik ve teslîm eylediğimde ol dahi târih-i mezbûrda zevcim mezbûr es-seyyid Osman’ın zimmetini ibrâ ve ıskāt eylediğimde ol dahi ibrâ ve kabûl etmeğin ol-vechile mehr-i mezkûr elli guruşun kırk guruşundan zevcim mezbûr es-Seyyid Osman’ın zimmeti berî ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mukırre-i mezbûre Saliha Hatun yine meclis-i şer‘de zevci mezbûr es-Seyyid Osman mahzarında i‘âde-i kelâm edip ashâb-ı hayrâtdan merhûm es-Seyyid eş-Şeyh Halil Efendi nâm sâhibü’l-hayrın sâlifü’z-zikr Uzun Yusuf mahallesinde vâki‘ câmi‘-i şerîfe [73b] bâ-emr-i sultânî vaz‘ olunan minber-i şerîf ve Havâss-ı refî‘a kazâsına muzâfe Büyükçekmece nâhiyesine muzâfe tâbi‘ Çakmaklı nâm karyede müceddeden binâ eylediği câmi‘-i şerîf hıdemâtı vakfı müsakkafâtından olup bi’l-icâreteyn taht-ı tasarrufumda olan mahalle-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzilimi işbu târih-i kitâb senesi Cumâdelevvelinin yirmi beşinci günü ve yine mahmiye-i mezbûrede Kâtib Murad Mescidi Vakfı müsakkafâtından olup kezâlik bi’l-icâreteyn taht-ı tasarrufumda olan mârrü’z-zikr Uzun Yusuf mahallesinde kâin ma‘lûmü’l-hudûd ve’l-müştemilât bir bâb vakıf menzilimi dahi işbu târih-i kitâb şehri gurresinde mütevellîleri ma‘rifetleri ve ferâğ-ı mu‘teber-i kat‘î ile zevcim mezbûr es-Seyyid Osman’a ferâğ ve tefvîz eylediğimde ol dahi ber-vech-i muharrer tefevvüz ve kabûl edip ol-vechile menzileyn-i mezkûreyn zevcim mezbûrun dâhil-i havza-i tasarrufu olmağla ben zikr olunan menzillere ve bedellerine müte‘allika âmme-i de‘âvîden zevcim mezbûr es-Seyyid Osman’ın zimmetini ibrâ ve ıskāt eyledim dedikde mâ-vaka‘a bi’t-taleb. Fî 14 min-C sene 1197 Eş-şâhidûnü’s-sâbıkūn.