Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 469 Hüküm no: 530 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Koruk Mahmud mahallesindeki yanmış ev arsasının bir kısmını Mehmed Ağa’ya sattığı Arsanın bir mikdârını ifrâz ve alâmet-i fâsıla ile ba‘de’l-imtiyâz mübâya‘a Mahmiye-i İslâmbol’da Paşakapısı kurbünde ( ?) mahallesinde sâkine Âişe Hatun bt. Ali tarafından husûs-ı âti’l-beyânı ikrâra vekîl olduğu zâtını ârifân Hasan b. Abdullah ve diğer Hasan b. Eyüb nâm kimesneler şehâdetleriyle şer‘an sâbit ve zâtı şâhidân-ı mezbûrân ta‘rîfleriyle mu‘arrefe olan Fatıma bt. Abdullah Hatun meclis-i şer‘-i hatîr-i lâzımü’t-tevkīrde işbu bâ‘isü’l-vesîka Mehmed Ağa b. Ali nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hatun bâ-hüccet-i şer‘iye şirâen yedinde mülk ve hakkı olup mahmiye-i mezbûrede Koruk Mahmud mahallesinde vâki‘ etrâf-ı erba‘ası Hasan Çavuş ve imâm ve müezzin meşrûtası ve Ahmed Ağa ve Mehmed Ağa menzilleri ve el-Hâc Halil bağçesi ve tarîk-i âm ile mahdûd bir bâb muhterik mülk menzil arsasının tarîk-i âm cânibinden otuz iki zirâ‘ mahâllini ifrâz ve alâmât-ı fâsıla vaz‘ıyla ba‘de’l-imtiyâz tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Ağa’ya on beş guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on beş guruşu müvekkilem mezbûre Âişe Hatun mezbûr Mehmed Ağa yedinden tamamen ahz ü kabz eyledi, ba‘de’l-yevm zikr olunan otuz iki zirâ‘ arsa mezbûr Mehmed Ağa’nın mülk-i müşterâsı ve hakk-ı sarfı olup müvekkilem mezbûre Âişe Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 24 min-C sene 1197 Şühûdü’l-hâl: Hasan b. Abdullah, diğer Hasan b. Eyüb, Hacı Hasan b. Osman, Salih b. Halil, Molla Ali b. Halil.