Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 468 Hüküm no: 529 Orijinal metin no: [76b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofular mahallesinden Hediyetullah Hatun’un yanmış ev arsasını Ayşe bt. Abdullah ile kocası Mustafa Ağa’ya sattığı Arsa mübâya‘ası Mahmiye-i İslâmbol’da Sofular mahallesinde sâkine Hediyetullah Hatun bt. el-Hâc Ali’nin zevci ve tarafından husûs-ı âti’l-beyânı ikrâra vekîl olduğu zâtını ârifân mahalle-i mezbûre imâmı Hafız Mehmed Emin Efendi b. el-Hâc Mehmed ve İbrahim Arslan şehâdetleriyle şer‘an sâbit olan Yeniçeri Kalemi hulefâlarından Mehmed Efendi b. Ahmed meclis-i şer‘-i hatîr-i lâzımü’t-tevkīrde sadrazam çukadârlarından işbu bâ‘isü’l-kitâb kendi nefsinden asîl ve zevcesi Âişe bt. el-Hâc Abdullah nâm hatun tarafından ber-vech-i âtî tasdîka vekîl olduğu nehc-i şer‘î üzere sâbit olan Mustafa Ağa b. Hüseyin mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin zevcem müvekkilem mezbûre Hediyetullah Hatun bâ-hüccet-i şer‘iye şirâen yedinde mülk ve hakkı olup mahalle-i mezbûrede vâki‘ bir tarafdan Uzun Mustafa Beşe menzili arsası ve bir tarafdan Nakkāş Ahmed Ağa arsası ve bir tarafdan ba‘zan Destgâhî Mustafa Odabaşı ve ba‘zan tarîk-i hâs ve tarîk-i hâssa meftûh sokak kapısı ve ba‘zan el-Hâc Mustafa Efendi arsaları ve bir tarafdan tarîk-i âm ile mahdûd derûnunda [77a] bir mahzen ve bir bi’r-i mâ ve enkāz-ı mevcûdeyi hâvî terbî‘an üç yüz seksen iki buçuk zirâ‘ bir bâb muhterik mülk menzil arsasını tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcân-ı mezbûrân Mustafa Ağa ve Âişe Hatun’a bi’l-münâsafe sekiz yüz altmış buçuk guruşa bey‘ ve temlik ve teslîm eylediğinde onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr sekiz yüz altmış buçuk guruşu müvekkilem mezbûre Hediyetullah Hatun zevcân-ı mezbûrân Mustafa Ağa ve Âişe Hatun yedlerinden tamamen ahz ü kabz eyledi, ba‘de’l-yevm arsa-i mahdûde-i mezkûre enkāz-ı mevcûdesiyle zevcân-ı mezbûrân Mustafa ve Âişe Hatun’un münâsafeten mülk-i müşterâları ve hakk-ı sarfları olup zevcem müvekkilem mezbûre Hediyetullah Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î. Fî 24 min-C sene 1197 Şühûdü’l-hâl: Hafız Mehmed Emin Efendi imâm-ı mahalle-i mezbûre, es-Seyyid Mehmed Emin Efendi b. Ahmed, Halil Beşe b. Abdullah, Çorbacı Mustafa Ağa b. Abdurrahman, es-Seyyid Molla Ahmed b. Süleyman, Berber İsmail, Abdülhalim Ağa, Molla Ali b. Halil.