Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 472 Hüküm no: 534 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evhaddin mahallesinden on üç yaşındaki Zeyneb bt. Mehmed’in ücreti karşılığında Saliha bt. Süleyman’ın evinde çalıştığı Ecr-i mislinden ibrâ ve tekrar îcâr ve istîcâr Mahmiye-i İslâmbol’da el-Hâc Evhaddin mahallesinde sâkine takrîben on üç yaşında olup cüssesinin dahi bulûğa tahammülü olmağla rü’yet-i dem-i hayzla bulûğunu mu‘terife ve zâtı zeyl-i sahîfede mektûbü’l-esâmî Müslimîn ta‘rîfleriyle mu‘arrefe olan Zeyneb bt. Mehmed nâm bikr-i bâliğa meclis-i şer‘-i şerîf-i enverde kezâlik zâtı Müslimûn-ı merkūmûn ta‘rîfleriyle mu‘arrefe olan işbu bâ‘isetü’l-kitâb Saliha bt. Süleyman nâm hatun mahzarında ikrâr ve takrîr-i kelâm edip bundan akdem mezbûre Saliha Hatun beni merhameten yanına alıp ba‘zı menzili hizmetinde istihdâm etmekle benim dahi târih-i kitâba gelince bir sene mezbûre Saliha Hatun’a hizmetim sebk etmiş idi. El-hâletü hâzihî müddet-i mezkûrede sebk eden hizmetimin ecr-i misline müte‘allika âmme-i de‘âvîden mezbûre Saliha Hatun ile zevci işbu hâzır bi’l-meclis Ahmed Beşe b. Mahmud’dan her birinin zimmetlerini ibrâ ve ıskāt eylediğimde onlar dahi ibrâmı kabûl eylediklerinden sonra ben yine mezbûre Saliha Hatun’un menzilinde hizmet etmek içün târih-i kitâbdan küllü yevm dörder para ücret tesmiyesiyle nefsimi mezbûre Saliha Hatun’a îcâr ve teslîm ve ücret-i müsemmâ-yı mezkûremi benim nafaka ve kisveme harc ü sarfa mezbûre Saliha Hatun’a emr ve tarafımdan mezbûreyi tevkîl eylediğimde ol dahi ber-vech-i muharrer istîcâr ve tesellüm ve kabûl ve harc u sarfa ta‘ahhüd eyledi dediğini mezbûre Saliha Hatun tasdîk etmeğin mâ-vaka‘a. Fî 25 min-C sene 1197 Şühûdü’l-hâl: Mustafa Efendi b. Halil imâm vekîli, Müezzin Ömer Efendi b. Osman, Nimetullah b. Mustafa, el-Hâc Ahmed Ağa b. Hasan, Hasan b. Mehmed, Molla Ali b. Halil.