Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 472 Hüküm no: 535 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İçinde mülkname hücceti ile beraber yanan Kazgancılar mahallesindeki evin Halil Efendi’ye ait olduğuna dair şahitler olduğu İstihbâr-ı arsa Mahrûse-i Galata’ya muzâfe Fındıklı kasabası mahallâtından Kazgancılar mahallesinde sâkin işbu bâ‘isü’l-vesîka el-Hâc Halil Efendi b. Osman meclis-i şer‘-i şerîf-i enverde takrîr-i kelâm ve bast-ı merâm edip mahmiye-i İslâmbol’da es-Seyyid Ömer mahallesinde vâki‘ bir tarafdan es-Seyyid İsmail Efendi arsası ve bir tarafdan Müezzin Molla Mustafa arsası ve bir tarafdan Zeyneb Hatun arsası ve bir tarafdan tarîk-i hâs ile mahdûd derûnunda bir bi’r-i mâ ve müştemilât-ı sâireyi hâvî terbî‘an iki yüz otuz zirâ‘ arsalı bir bâb mülk menzil Haffâf Ali Efendi’den üç yüz guruş semen-i medfû‘ ve makbûza müşterâ ve altmış sene mikdârı bilâ-nizâ‘ yedimde mülk ve hakkım iken menzil-i mahdûd-ı mezkûr ile yedimde olan mülknâme hüccetim bundan akdem vukū‘ bulan harîk-i kebîr-i gālibde bi’l-külliye muhterik olmağla takrîrim zabt ve tahrîr ve husûs-ı mezkûra vukūf-ı tammı olan bî-garaz Müslimînden suâl ve istihbâr ve haberleri hüccet olunmak matlûbumdur dedikde hakīkat-i hâl bi’l-cümle mukırr-ı mezbûr el-Hâc Halil Efendi’nin bâlâda bast ü beyân ve şerh ü ayân eylediği minvâl üzere olduğunu mârrü’z-zikr es-Seyyid Ömer mahallesi ahâlisinden es-Seyyid İsmail Efendi b. es-Seyyid İbrahim ve es-Seyyid Ahmed Ağa b. İbrahim ve Salih b. Halil nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 26 min-C sene 1197 Şühûdü’l-hâl: Molla Ali b. Halil, Salih b. Halil, Mustafa b. Mustafa.