Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 474 Hüküm no: 537 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat’taki Meydancık bostanındaki âletlerin sahibi Meyrem ile onları kiralayan Hıristo v. Tiryani arasındaki ücret anlaşmazlığına son verildiği 75 guruş ibrâsı meccânen Mahmiye-i İslâmbol’da Balat kapısı kurbünde vâki‘ Meydancık bostanı demekle ma‘rûf bostanda mütemekkin Bağçevân Niyo v. Miyo nâm zimmî meclis-i şer‘-i hatîrde işbu hâmilü’r-rakīm Hıristo v. Tiryani nâm zimmî muvâcehesinde ikrâr ve takrîr-i kelâm edip zikr olunan bostan derûnunda mevcûde beyne’l-hıref gedik ta‘bîr olunur eşcâr-ı müsmire ve sebzevât-ı mezrû‘a-i müdrike ve sâir âlât-ı lâzıme-i ma‘lûmenin mâlikesi gāibe ani’l-meclis Meyrem nâm Nasrâniye gedik-i mezkûru bin yüz doksan altı senesi rûz-ı Kasım’ı ibtidâsından beher şehr onar guruş ücret tesmiyesiyle mesfûr Hıristo zimmîye îcâr ve teslîm eyledikde ol dahi ba‘de’l-istîcâr ve’t-tesellüm gedik-i mezkûrun ücret-i müsemmâ-yı mezkûresinden yedi buçuk ayda mesfûr Hıristo zimmî zimmetinde terâküm eden yetmiş beş guruşu bağçevân ustaları ma‘rifetleriyle ben gāibe-i mersûme Meyrem Nasrâniyeye edâ ve teslîm etmemle meblağ-ı mezbûr yetmiş beş guruşu ben bu esnâda merkūm Hıristo zimmîden taleb ve da‘vâ sadedinde olmuş idim. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden meccânen fâriğ olup meblağ-ı mezbûr yetmiş beş guruşa ve bi’l-cümle husûs-ı mezkûra müte‘allika âmme-i de‘âvîden mesfûr Hıristo zimmînin zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î. Fî 26 C sene 1197 Şühûdü’l-hâl: Molla Ali b. Halil, Salih b. Halil, Ali Ağa b. Mehmed, Bağçevân Çelo, Bağçevân Toto, Diğer Usta Toto, Bağçevân Üstoyko ve gayruhum.