Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 473 Hüküm no: 536 Orijinal metin no: [77b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Şeref mahallesinden olup hac yolunda vefat eden İbrahim Efendi’nin mirasçıları arasındaki anlaşmazlığa sulh bedeli karşılığı son verildiği Mîrâsdan ibrâ Mahmiye-i İslâmbol’da Molla Şeref mahallesi ahâlisinden olup bundan akdem hacc-ı şerîfe gider iken esnâ-i tarîkde Bahr-ı Süveyş’de vefât eden İbrahim Efendi b. el-Hâc Ahmed’in verâseti zevce-i menkûha-i metrûke[si] Emine bt. el-Hâc Mehmed nâm hatun ile li-ebeveyn ammi oğulları Veliyüddin ve Hasan ibney Mehmed nâm kimesnelere münhasıra ve mesele-i mîrâsları sekiz sehm i‘tibârıyla iki sehmi zevcesi mezbûre Emine Hatun’a ve üçer sehmden altı sehmi mezbûrân Veliyüddin ve Hasan’a isâbeti tahakkukundan sonra kendi nefsinden asîl ve karındaşı mezbûr Veliyüddin tarafından husûs-ı âti’l-beyânda vekîl olduğu es-Seyyid Mustafa Efendi b. es-Seyyid Hasan ve Ali b. Mustafa nâm kimesneler şehâdetleriyle şer‘an sâbit mezbûr Hasan vekâleten meclis-i şer‘-i şerîf-i enverde tereke-i müteveffâ-yı mezbûra bi’l-verâse vâzı‘atü’l-yed olan mu‘arrefetü’z-zât işbu bâ‘isetü’l-kitâb zevce-i mezbûre Emine Hatun mahzarında bi’l-asâle ve bi’l-vekâle ikrâr ve takrîr-i kelâm edip mûrisimiz müteveffâ-yı mezbûrun mecmû‘-ı terekesine zevcesi mezbûre Emine Hatun vâzı‘atü’l-yed olmağla ben ve karındaşım müvekkilim mezbûr Veliyüddin tereke-i müteveffâ-yı mezbûrdan i‘tibâr-ı mezkûr üzere hisse-i irsiye-i ma‘lûmemizi bu esnâda mezbûre Emine Hatun’dan taleb ve da‘vâya tesaddî etmiş idik. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremizden bizi mezbûre Emine Hatun ile sıhhat-i sulh-ı tehârüc mevcûde olduğu hâlde tereke-i müteveffâ-yı mezbûrdan ber-i‘tibâr-ı mezkûr altı sehmden isâbet eden hisse-i irsiyemizden ezyed olan yüz guruş üzerine inşâ-i akd-i sulh eylediklerinde biz dahi sulh-ı mezkûru kabûl ve bedel-i sulh olan meblağ-ı mezbûr yüz guruşu mûrisimiz müteveffâ-yı mezbûrun terekesinden olmak üzere mezbûre Emine Hatun yedinden bi-kadri’l-hısas tamamen ahz ü kabz edip mûrisimiz müteveffâ-yı mezbûrun cüz’î ve küllî terekesine ve hukūk-ı mîrâsa müte‘allika âmme-i de‘âvî ve kâffe-i mutâlebâtdan mezbûre Emine Hatun’un zimmetini ibrâ-i âm ile bi’l-asâle ve bi’l-vekâle ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î. Fî 26 min-C sene 1197 Şühûdü’l-hâl: Hafız el-Hâc Ali Efendi b. el-Hâc Mehmed imâm, el-Hâc Mehmed Efendi b. el-Hâc Ali, Hafız el-Hâc Mehmed Efendi b. Musa imâm-ı Molla Şeref, Çorbacı Süleyman Ağa b. ( ), Molla b. Halil ve gayruhum.