Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 475 Hüküm no: 539 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pîrî mahallesinden Emine Hatun’un bazı eşyalarını babası Mehmed’e sattığı Eşyâ mübâya‘ası Mahmiye-i İslâmbol’da el-Hâc Pîrî mahallesinde sâkine ve zâtı vech-i şer‘î üzere mu‘arrefe olan Emine nâm hatun meclis-i şer‘-i şerîf-i enverde babası işbu bâ‘isü’l-kitâb Mehmed b. Mustafa nâm kimesne mahzarında ikrâr ve takrîr-i kelâm edip eşyâ-i memlûkemden bâ-defter-i müfredât yün memlû iki çatma yasdık ve bir minder ve bir beledî döşek ma‘a çârşeb ve bir yemeni yorgan ma‘a çârşeb ve iki sahan bâ-kapak ve bir tencere bâ-kapak ve beş kat câmeşûy ve beş uçkur ve beş yağlık ve bir âbdest makramesi ve bir iş makramesi ve iki şali entari ve bir çuka ferâcemi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile babam mezbûr Mehmed’e yirmi beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruş mutâlebesinden babam mezbûr Mehmed’in zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm eşyâ-i muharrere-i mezkûre babam mezbûr Mehmed’in mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 27 min-C sene 1197 Şühûdü’l-hâl: Mehmed Emin Kirişçi, Mehmed Emin Debbâğ, Ahmed Debbâğ, Salih b. Halil, Ali Ağa b. Mustafa.