Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 476 Hüküm no: 540 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macunî Kasım mahallesinden Müezzin Süleyman Efendi’nin yanmış ev arsasını Müezzin Mehmed Efendi’ye sattığı Mübâya‘a-i arsa sûret-i kat‘î lâkin vefâendir Mahmiye-i İslâmbol’da Ma‘cûnîkasım mahallesinde sâkin Müezzin Süleyman Efendi b. İbrahim meclis-i şer‘-i şerîf-i enverde işbu bâ‘isü’l-kitâb Müezzin Mehmed Efendi b. Ali mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Ma‘cûnî Vakfı’ndan Süleyman Ağa tasarrufunda olan hân ve bir tarafdan Arabacı kârhânesi ve bir tarafdan es-Seyyid Mustafa Ağa bağçesi ve bir tarafdan tarîk-i âm ile mahdûd bir bâb muhterik mülk menzil arsası ile zikr olunan es-Seyyid Mustafa Ağa bağçesi tarafından yüz dört zirâ‘ arsamı dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Mehmed Efendi’ye yüz elli guruşa bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz elli guruşu mezbûr Mehmed Efendi yedinden tamamen ahz ü kabz eyledim, ba‘de’l-yevm arsa-i mahdûde-i mezkûreler mezbûr Mehmed Efendi’nin mülk-i müşterâsı olmuşdur dedikde gıbbe’t-tasdîki’ş-şer‘î. Fî 26 min-C sene 1197 Şühûdü’l-hâl: İbrahim Çavuş Ağa b. Halil, Hüseyin Çavuş Ağa b. Mehmed, Çukadâr İbrahim Ağa b. Mehmed, Molla Ali b. Halil, Attâr Osman Ağa, Saka Mustafa Çavuş Ağa.