Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 482 Hüküm no: 548 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emin-i Cev mahallesinden Fatma bt. Abdullah’ın ev eşyalarını beraber evde beraber kaldığı Hadice bt. Mustafa’ya sattığı Eşyâ mübâya‘ası ma‘a nefy-i mülk ve sâireden ibrâ Mahmiye-i İslâmbol’da Yenibahçe kurbünde Emîn-i Cev mahallesinde sâkine ve zâtı vech-i şer‘î üzere mu‘arrefe olan Fatıma bt. Abdullah nâm hatun meclis-i şerîf-i enverde kezâlik zâtı mu‘arrefe olan işbu bâ‘isetü’l-vesîka Hadice bt. Mustafa nâm hatun mahzarında ikrâr ve takrîr-i kelâm edip mezbûre Hadice Hatun ile mahalle-i mezbûrede vâki‘ mâ‘an sâkine olduğum menzil derûnunda mevcûde benim yedimde mâlım ve mülküm ancak kıtık memlû on çatma yasdık ve üç çuka mak‘ad ve iki minder ve bir beledî döşek ve iki şilte ve üç yemeni yorgan ma‘a çârşeb ve bir âbdest ibriği ve bir kahve ibriğine münhasıra olup bunlarından mâ‘adâ menzil-i mezkûrda mevcûde bisât-ı beyt ve evân-ı nühâsiye ve gayr-ı nühâsiye ve bi’l-cümle eşyâ mezbûre Hadice Hatun’un mâlı ve mülkü olup benim kat‘a alâka ve medhalim olmamağın ben eşyâ-i muharrere-i mezkûreyi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide mezbûre Hadice Hatun’a yirmi guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruşa ve sâire müte‘allika âmme-i de‘âvî ve kâffe-i mutâlebâtdan mezbûr Hadice Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm eşyâ-i muharrere-i mezkûre mezbûre Hadice Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 2 B sene 1197 Şühûdü’l-hâl: Mehmed Salim Efendi b. Hüseyin, Molla Ali b. Halil, Salih b. Halil, Ali Ağa b. Mehmed.