Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 481 Hüküm no: 547 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üskübî mahallesinden Mehmed Emin Efendi’nin yevmi kırk sekiz akçelik esamisini Hasan b. Mustafa’ya sattığı Esâme kasr-ı yedi Mahmiye-i İslâmbol’da Unkapanı dâhilinde Üskübî mahallesinde sâkin Mehmed Emin Efendi b. Mehmed nâm kimesne meclis-i şer‘-i şerîf-i enverde işbu bâ‘isü’l-kitâb Hasan b. Mustafa nâm kimesne mahzarında ikrâr ve takrîr-i kelâm edip benim Silahdâr ocağında on ikinci bölükde Mehmed Mehmed nâm ismiyle mutasarrıf olduğum yevmî kırk sekiz akçe esâmîmi bundan akdem hüsn-i rızâ ve ihtiyârımla mezbûr Hasan’a ferâğ ve bi’l-külliye kasr-ı yed ve ibtidâ ta‘bîr olunur tezkiresini dahi yedine teslîm eylediğimde ol dahi bedel-i ferâğ olmak üzere bana mâlından teberru‘an dört yüz seksen guruş def‘ ü teslîm eyledikde ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr Hasan’ın zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezkûr dört yüz seksen guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a bi’t-taleb. Fî 3 min-B sene 1197 Şühûdü’l-hâl: Es-Seyyid el-Hâc Süleyman b. Mehmed, İsmail Çavuş Ağa b. Hasan, el-Hâc Mehmed b. Abdullah, Veliyüddin Ağa b. Abdullah, Zileli Ebûbekir Çavuş Ağa b. İbrahim, Molla Ali b. Halil ve gayruhum.