Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 484 Hüküm no: 551 Orijinal metin no: [79b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasırcı mahallesinden Hadice bt. Resul ile Ali b. Hasan’ın boşandıkları Muhâla‘a Mahmiye-i İslâmbol’da Mevlevîhâne Yenikapısı dâhilinde Hasırcı mahallesinde sâkine ve zâtı vech-i şer‘î üzere mu‘arrefe olan Hadice bt. Resul nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb el-Hâc Ali b. el-Hâc Hasan nâm kimesne mahzarında ikrâr ve takrîr-i kelâm edip mezbûr el-Hâc Ali zevcim olup lâkin beynimizde hüsn-i mu‘âşeretimiz olmamağla iki def‘a akidde müsemmâ zimmetinde mütekarrer ve ma‘kūdun-aleyh olan yirmi iki guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr el-Hâc Ali ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 4 min-B sene 1197 Şühûdü’l-hâl: el-Hâc Ali b. Mustafa, Molla Ali b. Halil, Salih b. Halil, Ali Ağa b. Mehmed.