Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 484 Hüküm no: 552 Orijinal metin no: [79b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa’dan on üç yaşındaki Ayşe bt. Mehmed’in, Âlicenab Hatun’un yanında çalışmasına karşılık parasını aldığı Ecr-i mislinden ibrâ Mahmiye-i İslâmbol’da Koca Mustafa Paşa mahallesinde sâkine takrîben on üç yaşında olup cüssesinin dahi bulûğa tahammülü olmağla rü’yet-i dem-i hayzla bulûğunu mu‘terife ve zâtı vech-i şer‘î üzere mu‘arrefe olan Âişe bt. Mehmed nâm hatun meclis-i şer‘-i şerîf-i enverde işbu bâ‘isetü’l-vesîka Âlicenab Hatun bt. Abdullah tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Bostânî el-Hâc Hasan Ağa b. Ali nâm kimesne mahzarında ikrâr ve takrîr-i kelâm edip bundan akdem müvekkile-i mezbûre Âlicenab Hatun beni merhameten yanına alıp ba‘zı menzili hizmetinde istihdâm etmekle ben dahi târih-i kitâba gelince beş sene mikdârı sıgār ve kiberim hâllerinde müvekkile-i mezbûreye hizmetim sebk etmişdi. El-hâletü hâzihî sinîn-i mezkûrede sebk eden hizmetimin ecr-i misli mukābelesinde müvekkile-i mezbûre mâlından nakid yirmi dört buçuk guruşunu bana def‘ ve teslîm eyledikde ben dahi yedinden tamamen ahz ü kabz edip sinîn-i mezkûrede sebk eden hizmetimin ecr-i misline müte‘allika âmme-i de‘âvî ve kâffe-i mutâlebâtdan müvekkile-i mezbûre Âlicenab Hatun’un zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 4 min-Receb sene 1197 Şühûdü’l-hâl: Es-Seyyid Mehmed b. es-Seyyid el-Hâc Hasan imâm, Molla Ali b. Halil, diğer Molla Ali b. İsmail, İsmail Odabaşı, Kolancı Seydi Ağa b. ( ) ve gayruhum.