Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 485 Hüküm no: 553 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıp olan Kasap Hasan Beşe’nin gitmeden önce karısı Hadice’yi boşadığına dair şahitler olduğu İstihbâr-ı tatlîk Mahmiye-i İslâmbol’da Koca Mustafa Paşa kurbünde Canbaziye mahallesinde sâkine ve zâtı vech-i şer‘î üzere mu‘arrefe olan işbu bâ‘isü’l-kitâb Hadice bt. Abdullah nâm hatundan meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden mârrü’z-zikr Koca Mustafa Paşa mahallesi ahâlisinden Eyüb b. Mehmed ve Ahmed b. Halil nâm kimesneler zât-ı müstahbire-i mezbûreyi ârifân oldukları hâlde li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûrenin zevci gāib ani’l-beled Kasab Hasan Beşe bin yüz doksan beş senesi Recebi’l-ferd’inin ikinci günü mârrü’z-zikr Canbaziye mahallesinde vâki‘ sâkin olduğu menzili kapısı önünde müstahbire-i mezbûrenin zevci gāib-i mezbûr zimmetinde ma‘kūdun-aleyh olan on beş guruş mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi müstahbire-i mezbûrenin kendi üzerine olmak üzere zevci gāib-i mezbûr ile muhâla‘a-i sahîha-i şer‘iye ile olduğu hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvîden her biri âharın zimmetini ibrâ ve ıskāt ve her biri âharın ibrâsını kabûl etmeğin ol-vechile müstahbire-i mezbûre Hadice Hatun târih-i mezbûrdan beri zevci gāib-i mezbûrdan mübâne olmuşdur, biz bu husûsa bu vech üzere şâhidleriz ve inde’l-hasm şehâdet dahi ederiz deyü her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 4 B sene 1197 Şühûdü’l-hâl: Eyüb b. Mehmed, Ahmed b. Halil, Molla Ali b. Halil.