Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 486 Hüküm no: 555 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Timur mahallesinden İbrahim ve Ahmed ile babaları Halil Ağa’nın tasarrufundaki vakıf evin ferağı için izin verildiği Vakıf menzil ferâğına izin hücceti Mahmiye-i İslâmbol’da el-Hâc Timur mahallesinde sâkine iken bundan akdem vefât eden Zeliha Hatun bt. Abdullah’ın sadrî sagīr oğulları İbrahim ve Ahmed’in babaları ve velîleri işbu bâ‘isü’l-kitâb Halil Ağa b. Ahmed meclis-i şer‘-i hatîrde bi’l-velâye takrîr-i kelâm ve bast-ı merâm edip mahmiye-i mezbûrede Davudpaşa mahallesinde vâki‘ ma‘lûmü’l-hudûd ve’l-müştemilât Mehmed Efendi nâm sâhibü’l-hayrın vakfı müsakkafâtından bir bâb menzilin nısf-ı şâyi‘i benim ve nısf-ı şâyi‘-i âharı dahi oğullarım sagīrân-ı mezbûrân İbrahim ve Ahmed’in anaları zevcem müteveffât-ı mezbûreden müntakil bi’l-icâreteyn taht-ı tasarrufumuzda olup lâkin ben menzil-i mezkûrda ber-vech-i muharrer mutasarrıf olduğum nısf hisse-i şâyi‘amı âhara ferâğ murâd edip sagīrân-ı mezbûrânın hisselerini ifrâz mümkün olmadığından mâ‘adâ menzil-i mezkûr müşrif-i harâb olmağla benim ve oğullarım sagīrân-ı mezbûrânın ta‘mîr ve termîme iktidârımız olmayıp bekāsı sagīrân-ı mezbûrâna muzır olmağın oğullarım sagīrân-ı mezbûrânın menzil-i mezkûrda olan nısf hisse-i şâyi‘aları benim hissem ile mâ‘an bedel-i misli ve mütevellîsi ma‘rifetiyle âhara ferâğ ve kabz-ı bedel ve bedeli istirbâh olunmak sagīrân-ı mezbûrân hakkında her vechile evlâ ve enfa‘ olmağın ber-vech-i muharrer kıbel-i şer‘den bana izin verilmek bi’l-velâye matlûbumdur dedikde hakīkat-i hâl mukırr-ı mezbûr Halil Ağa’nın takrîr-i meşrûhu üzere olduğu zeyl-i sahîfede mektûbü’l-esâmî bî-garaz Müslimîn ihbârlarıyla zâhir ve mütehakkık olmağın menzil-i mezkûru ber-minvâl-i muharrer âhara ferâğa mezbûr Halil Ağa’ya kıbel-i şer‘den izin verilmeğin mâ-vaka‘a bi’t-taleb. Fî 7 min-B sene 1197 Şühûdü’l-hâl: Mehmed Salim Efendi b. Hüseyin, Alemdâr İbrahim Ağa b. Halil, Alemdâr Hüseyin Ağa b. Abdülkerim, Mustafa Ağa b. Mehmed, Molla Ali b. Halil.