Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 487 Hüküm no: 556 Orijinal metin no: [80a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın Alifakih mahallesinde bulunan evdeki yarı hissesini Ahmed Efendi’ye sattığı Nısf menzil mübâya‘ası Medîne-i hazret-i Ebî Eyyûb Ensârî’de -radiye anhü rabbihi’l-bârî- Kızıl Mescid mahallesinde sâkin Mustafa Ağa b. Ahmed meclis-i şer‘-i şerîf-i enverde Yeşil Bayrak halîfesinden işbu bâ‘isü’l-kitâb Ahmed Efendi b. Mustafa tarafından husûs-ı âti’l-beyânı tasdîka vekîl olduğu ber-nehc-i şer‘î olan es-Seyyid el-Hâc İbrahim Ağa b. Mehmed nâm kimesne mahzarında ikrâr ve takrîr-i kelâm edip mahmiye-i İslâmbol’da Ali Fakih mahallesinde vâki‘ iki tarafdan vakıf arsa ve iki tarafdan tarîk-i âm ile mahdûd ve hâriciye ve dâhiliyede beş bâb oda ve müştemilât-ı sâireyi muhtevî bir bâb mülk menzilin nısf-ı şâyi‘i müşterî-i müvekkil-i mezbûrun ve nısf-ı şâyi‘-i âharı dahi benim bâ-hüccet-i şer‘iye şirâen yedimizde mülk ve hakkımız olmağın ben menzil-i mahdûd-ı mezkûrda ber-vech-i muharrer mâlik olduğum nısf hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Ahmed Efendi’ye üç yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz guruşu müvekkil-i mezbûr yedinden tamamen ahz ü kabz eyledim, ba‘de’l-yevm menzil-i mahdûd-ı mezkûrun nısf-ı şâyi‘inde benim kat‘a alâka ve medhalim kalmayıp müvekkil-i mezbûr Ahmed Efendi’nin müstakıllen mülk-i sahîh ve hakk-ı sarîhi olmuşdur dedikde gıbbe’t-tasdîki’ş-şer‘î. Fî 7 min-B sene 1197 Şühûdü’l-hâl: Es-Seyyid İsmail Ağa b. es-Seyyid İbrahim kethudâ-yı bahçevân, Mustafa Ağa b. Ömer, Ahmed Efendi b. İbrahim, el-Hâc Yusuf b. Abdullah, Mehmed Memiş b. Abdullah, Mehmed Emin b. Mehmed, Molla Ali b. Halil.