Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 491 Hüküm no: 561 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Naile bt. Ahmed’in ev işlerinde çalışan Keziban bt. Ali’nin çalışmasına karşılık bir miktar para ve bazı eşyalar aldığı Ecr-i mislinden kezâlik ibrâ Mahmiye-i İslâmbol’da Tarsus mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Keziban bt. Ali nâm hatun meclis-i şer‘-i şerîf-i enverde kezâlik mu‘arrefetü’z-zât işbu bâ‘isü’l-kitâb Nâile bt. Ahmed nâm hatun mahzarında ikrâr ve takrîr-i kelâm edip bundan akdem mezbûre Nâile Hatun beni yanına alıp ba‘zı menzili hizmetinde istihdâm etmekle benim dahi târih-i kitâba gelince yedi sene mikdârı bilâ-tesmiyeti’l-ücret mezbûre Nâile Hatun menzilinde hizmetim sebk etmiş idi. El-hâletü hâzihî sinîn-i merkūmede sebk eden hizmetimin ecr-i misli mukābelesinde mezbûre Nâile malından nakid yirmi guruş ile üç Şam alacası entari ve iki keremsûd hırka ve iki alaca şalvar ve bir çuka ferâce ve bez ve hilâlî beş gömlek ma‘a don ve bir beledî döşek ve iki çârşeb ve bir yorgan bâ-çârşeb işleme ve sâde dört iş makramesi ve altı işleme uçkur ve iki çevre ve üç yağlık ve bir destâr örtüsü ve dört değirmi baş yemenisi ve zümrüd taşlı bir çift altın küpe ve bir çift sîm kuşağını bana def‘ ve teslîm eylediğinde ben dahi bi-a‘yânihâ yedinden ahz ü kabz edip sinîn-i merkūmede sebk eden hizmetimin ecr-i misline müte‘allika âmme-i de‘âvî ve kâffe-i mutâlebâtdan mezbûre Nâile Hatun ile zevci işbu hâzır bi’l-meclis Hafız Mustafa Efendi b. Ömer’den her birinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a bi’t-taleb. Fî 9 min-B sene 1197 Şühûdü’l-hâl: Mehmed Said Efendi b. Ali imâm-ı mahalle-i mezbûre, Ahmed Çavuş Ağa b. ( ), Ahmed Ağa b. Mahmud, Mustafa Beşe b. Ahmed, Molla Ali b. Osman, Hafız İbrahim Efendi b. Mahmud, Cafer b. Halil, Molla Ali b. Halil, Salih b. Halil.