Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 490 Hüküm no: 560 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ördek Kasap mahallesinden Mahbube bt. Abdullah’ın ev işlerinde çalışan Emine bt. Hüseyin’in çalıştığı zamana ait ücretini aldığı Ecr-i mislinden ve sâireden ibrâ Mahmiye-i İslâmbol’da Ördek Kasab mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Emine bt. Hüseyin nâm hatun meclis-i şer‘-i şerîf-i enverde işbu bâ‘isü’l-kitâb Mahbube bt. Abdullah nâm hatun tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Mustafa Ağa b. Süleyman mahzarında ikrâr-ı tam ve takrîr-i kelâm edip müvekkile-i mezbûre Mahbube Hatun beni yanına alıp ba‘zı menzili hizmetinde istihdâm etmekle benim dahi târih-i kitâba gelince dört ay bilâ-tesmiyeti’l-ücret müvekkile-i mezbûreye menzilinde hizmetim sebk etmiş idi. El-hâletü hâzihî şühûr-ı merkūmede sebk eden hizmetimin ecr-i misli mukābelesinde müvekkile-i mezbûre Mahbube Hatun’un mâlından olmak üzere vekîl-i mezbûr Mustafa Ağa işbu meclis-i şer‘de bana nakid on guruş def‘ ve teslîm eyledikde ben dahi yedinden tamamen ahz ü kabz edip şühûr-ı merkūmede sebk eden hizmetin ecr-i misline ve sâire müte‘allika âmme-i de‘âvî ve kâffe-i mutâlebâtdan müvekkile-i mezbûre Mahbube Hatun ile zevci Memiş Efendi b. Ali ve sulbî kebîr oğlu Mehmed Emin Ağa’dan her birinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î. Fî 9 min-B sene 1197 Şühûdü’l-hâl: Hüseyin Efendi b. Hasan imâm-ı mahalle-i Davudpaşa, Mehmed Salim Efendi b. el-mezbûr Hüseyin Efendi, es-Seyyid Ahmed Ağa b. Mustafa, Mehmed Çavuş Ağa b. eş-Şeyh Ebîbekir, Molla Ali b. Halil, Ali Beyefendi b. Ali, Mustafa b. Mustafa ve gayruhum.