Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 494 Hüküm no: 566 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evhaddin mahallesinden Emine bt. Mehmed ile Feyzullah Beşe’nin boşanması Muhâla‘a Mahmiye-i İslâmbol’da el-Hâc Evhaddin mahallesinde sâkine ve zâtı vech-i şer‘î üzere mu‘arrefe olan Emine bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid Feyzullah Beşe b. Mehmed nâm kimesne mahzarında ikrâr ve takrîr-i kelâm edip mezbûr es-Seyyid Feyzullah Beşe zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kūdun-aleyh olan üç bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Feyzullah Beşe ile muhâla‘a-i sahîha-i şer‘iye ile hul‘ olduğumuzda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevcim mezbûr es-Seyyid Feyzullah Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 10 min-B sene 1197 Şühûdü’l-hâl: Molla Ali b. Halil, Salih b. Halil, Molla Mehmed b. Mustafa, Ali Ağa b. Mehmed, Mustafa b. Mustafa, Hüseyin Efendi b. İbrahim imâm.