Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 496 Hüküm no: 569 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiremit mahallesinde Dülger Mihal’in ücretin bir kısmını alıp diğer kısmını da daha sonra almak üzere Bostancı Ali Ağa’ya bir ev yaptığı Vakıf arsa üzerine mutasarrıfının emriyle ebniye ihdâs ve ahz ü kabz Mahmiye-i İslâmbol’da Sultan Selim Câmi‘-i şerîfi kurbünde Kiremit mahallesinde mütemekkin Dülger Mihal v. Lingori nâm zimmî meclis-i şer‘-i şerîf-i enverde işbu bâ‘isü’l-kitâb Bostânî Ali Ağa b. Halil nâm kimesne mahzarında ikrâr ve takrîr-i kelâm edip mezbûr Ali’nin taht-ı tasarrufunda olup mahmiye-i mezbûrede Kazganî Sa‘di mahallesinde vâki‘ ma‘lûmü’l-hudûd bir bâb vakıf arsası üzerine mecmû‘u yüz yirmi beş zirâ‘ olmak üzere beher zirâ‘ı sekizer guruşdan cem‘an bin guruş ile hâriciyesinde tahtânî bir bâb oda ve bir ahur ve bir kenîf ve dâhiliyesinde fevkānî iki bâb oda ve dîvânhâne ve dehliz ve bir âbdesthâne ve bir kenîf ve tahtında bir matbah ve bir mağsel ve sokak kapısını muhtevî ebniyenin ancak cam ve çerçevelerin mezbûr Ali Ağa’nın kendi üzerine olup mâ‘adâ kereste ve mismâr ve kireç ve sâir levâzımât-ı ma‘lûmesi ile dülger ve rençber ve duvarcı ve sıvacı ve sâire gündelikleri dahi benim üzerime üzere zikr olunan ebniyeyi müceddeden binâ ve ihdâs edip ba‘de’t-tekmîl miftâhını yedine teslîm etmek üzere bundan akdem mezbûr Ali Ağa ile mukāvele olundukdan sonra ben ber-vech-i muharrer zikr olunan odaların doğrama yüklük ve dolapları ile sıvasından mâ‘adâsını tekmîl etmemle mezbûr Ali Ağa dahi meblağ-ı mezbûr bin guruşun sekiz yüz altmış beş guruşunu ceste ceste bana def‘ ve teslîm ben dahi yedinden ahz ü kabz [ve] zikr olunan odaların doğrama yüklük ve dolapları ile sıva-i mezkûru tekmîle ve mezbûr Ali Ağa dahi meblağ-ı mezbûr bin guruşdan zimmetinde bâkī kalan yüz otuz beş guruşu bana yine ceste ceste edâya her birimiz ba‘de’t-ta‘ahhüd eğer ben zikr olunan ebniyeden zarar etmişdim deyü ebniye-i mezkûreyi mi‘mâr ağa ma‘rifetiyle keşf ve mezbûr Ali Ağa’dan nesne mutâlebesinde olur isem lede’l-hükkâmi’l-kirâm mesmû‘a ve makbûle olmasın dedikde mezbûr Ali Ağa dahi mukırr-ı mesfûr Dülger Mihal zimmîyi cemî‘ kelimât-ı meşrûhasında vicâhen ve şifâhen tasdîk etmeğin mâ-vaka‘a bi’t-taleb. Fî 29 min-C sene 1197 Şühûdü’l-hâl: Darbhâne kâtibi Ahmed Efendi, Musa Beşe b. ( ), Molla Ali b. Halil, Molla Mehmed b. Mustafa, el-Hâc Hasan b. Osman [Defterdeki kayıtlar 82a-1’den sonra sondan başa doğru, ters olarak tutulmuştur. Karışıklığa mahal vermemek için defterde ters bulunan kayıtlar çevrilmiş, sayfalar yeniden numaralandırılmıştır ].