Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 495 Hüküm no: 568 Orijinal metin no: [81b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İçinde mülkname hücceti ile yanan İbrahimpaşa mahallesindeki evin Fatma bt. İsmail’e ait olduğuna dair şahitler olduğu İstihbâr-ı menzil Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu bâ‘isetü’l-vesîka Fatıma bt. İsmail nâm hatun meclis-i şer‘-i şerîf-i enverde takrîr-i kelâm ve bast-ı merâm edip mahalle-i mezbûrede vâki‘ bir tarafdan Mehmed Emin menzili ve bir tarafdan Ahmed Ağa menzili ve bir tarafdan ba‘zan el-Hâc Mustafa veresesi ve ba‘zan Lağımcı Hüseyin Beşe menzilleri ve bir tarafdan tarîk-i âm ile mahdûd ve fevkānî iki bâb oda ve sofa ve tahtında bir bâb oda ve kenîf ve bi’r-i mâ ve bir mikdâr havluyu müştemil bir bâb mülk menzil bundan akdem vefât eden zevcim Mehmed Bey b. Hüseyin nâm kimesneden yüz elli guruş semen-i medfû‘ ve makbûza müşterâ ve târih-i kitâba gelince yirmi sene mikdârı bilâ-nizâ‘ yedimde mülk ve hakkım iken yedimde olan mülknâme hüccetim bundan akdem vukū‘ bulan harîk-i kebîr-i gālibde muhterik olmağla takrîrim zabt ve tahrîr ve husûs-ı mezkûra vukūf-ı tammı olan bî-garaz Müslimîn’den suâl ve istihbâr ve haberleri hüccet olunmak matlûbumdur dedikde hakīkat-i hâl bi’l-cümle mukırre-i mezbûre [82a] Fatıma Hatun’un bâlâda bast ü beyân ve şerh ü ayân eylediği minvâl üzere olduğunu mahalle-i mezbûre ahâlisinden Mehmed Emin Beşe b. el-Hâc Hüseyin ve İsmail Beşe b. Mehmed ve Çulha Ahmed Ağa b. Mehmed nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 11 min-B sene 1197 Şühûdü’l-hâl: Çulha Ahmed Ağa b. Mehmed, Mehmed Emin Beşe b. el-Hâc Hüseyin, İsmail Beşe b. Mehmed, Molla Ali b. Halil, Salih b. Halil.