Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 497 Hüküm no: 571 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinde vefat eden Ahmed Ağa’dan vârislerine kalan evin yine vârislerden Ali Ağa’ya satıldığı Mâ fîhi mine’l-bey‘ ve’ş-şirâ İsa el-müvellâ-hilâfeten bi-mahkemeti Davudpaşa bi-Dâri’s-saltanati’s-seniyye nemakahû el-fakīru ileyhi azze şânühû -gufira lehû- Mahmiye-i İslâmbol’da Ali Fakih mahallesinde sâkin iken bundan akdem vefât eden Ahmed Ağa b. Mustafa’nın zevce-i menkûha-i metrûkesi Zeyneb bt. Abdullah nâm hatun ile sulbî kebîr oğulları Ali Ağa ve Abdullah Ağa’ya ve sulbiye kebîre kızları Rüveyda Hanım ve Âişe Hanım’a münhasıra ve tashîh-i meselesi bi-hükmi’l-ferâiz kırk sekiz sehm i‘tibârıyla altı sehmi zevcesi mezbûre Zeyneb Hatun’a ve on dört sehmden yirmi sekiz sehmi oğulları mûmâ-ileyhimâ Ali Ağa ve Abdullah Ağa’ya ve yedişer sehmden on dört sehmi kızları mûmâ-ileyhimâ Rüveyda Hanım ve Âişe Hanım’a isâbeti tahakkukundan sonra kendi tarafından asîl ve vâlidesi mezbûre Zeyneb Hatun ile kız karındaşları mûmâ-ileyhimâ Rüveyda Hanım ve Âişe Hanım taraflarından bey‘-i âti’z-zikre vekîl olduğu zât-ı mezbûrâtı bi’l-ma‘rifeti’ş-şer‘iye ârifân İbrahim Ağa b. Ali ve Ahmed Ağa b. Mahmud nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan mûmâ-ileyh Abdullah Ağa meclis-i şer‘-i şerîf-i enverde karındaşı fahrü’l-emâsil ve’l-akrân işbu sâhibü’l-kitâbi’l-müstetâb mûmâ-ileyh Ali Ağa mahzarında bi’l-asâle ve bi’l-vekâle ikrâr ve takrîr-i kelâm edip mahalle-i mezbûrede kâin etrâf-ı erba‘ası Koca Mustafa Paşa imâmı vakfı menzili ve mahalle-i mezbûre imâmına meşrûta vakıf menzil ve Ali Ağa menzili ve tarîk-i hâs ile mahdûd hâriciyede üç bâb fevkānî oda ve tahtında bir ahur ve bi’r-i mâ ve kenîf ve dâhiliyede iki bâb fevkānî oda ve dehliz ve bir bâb tahtânî oda ve matbah ve kenîf ve cüneyneyi müştemil bir bâb mülk menzil ve yine ittisâlinde kâin etrâf-ı erba‘ası Tabib Mustafa Efendi ve Kafesdâr Ali Çelebi menzilleri ve mekābir-i Müslimîn ve tarîk-i âm ile mahdûd fevkānî bir bâb oda ve bir sofa ve tahtânî bir bâb oda ve matbah ve kenîf ve müşterek bi’r-i mâ ve havluyu müştemil bir bâb mülk menzil ki iki kıt‘a menzil mûrisimiz müteveffâ-yı mezbûr Ahmed Ağa’nın hayatında bâ-hüccet-i şer‘iye ile’l-vefât yedinde mülkü ve ba‘de vefâtihî tashîh-i merkūm üzere bana ve müvekkillerim mezbûrâta ve mûmâ-ileyh Ali Ağa’ya mevrûs olmuş idi. El-hâletü hâzihî ben menzileyn-i mezkûreteynde olan on dört sehm hisse-i irsiyem ile müvekkillerim mezbûrât Zeyneb ve Rüveyda ve Âişe Hanım’ın yirmi sehm hisse-i irsiye-i ma‘lûmelerini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile karındaşım mûmâ-ileyh Ali Ağa’ya bi’l-asâle ve bi’l-vekâle sekiz yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr sekiz yüz guruşu karındaşım mûmâ-ileyh Ali Ağa yedinden ben ve müvekkillerim mezbûrâtdan her birimiz bi-kadri’l-hısasi’l-merkūme tamamen ve kâmilen ahz ü kabz eyledik fî-mâ ba‘d menzileyn-i mezkûreteynde benim ve müvekkillerim mezbûrât Zeyneb ve Rüveyda ve Âişe Hanım’ın kat‘a alâka ve medhalimiz kalmayıp on dört sehmi irsen ve otuz dört sehmi şirâen karındaşım mûmâ-ileyh Ali Ağa’nın mülk-i mahzı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb. Fî 3 min-Ş sene 1188 Şühûdü’l-hâl: İbrahim Ağa b. Ali, Ahmed Ağa b. Mahmud, Ali Çavuş Ağa b. Ahmed, es-Seyyid Ali Efendi b. Halil, Hasan Ağa b. Mustafa, el-Hâc Hasan b. Osman, diğer Ali Çavuş b. Abdullah, Molla Ali b. Halil, Salih b. Halil, Hasan b. Süleyman.