Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 498 Hüküm no: 572 Orijinal metin no: [82b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesinde vefat eden Mustafa b. Mehmed’in terekesinden olan evin yarı hissesini hayatta iken hanımı Emine’ye satmış olduğu El-emrü hasbe mâ zükire fîhi Mehmed Celale’d-dîn el-müvellâ hilâfeten bi-mahkemeti Davudpaşa bi-Dâri’l-hilâfeti nemakahu el-fakīru azze şânühû -gufira leh- Mahmiye-i İslâmbol’da Sancakdâr Hayreddin mahallesinde sâkin olup iki seneden beri maraz-ı müzmine mübtelâ olduğu hâlde bundan akdem vefât eden el-Hâc Mustafa b. Mehmed b. Süleyman nâm kimesnenin verâseti zevce-i metrûkesi Emine bt. Mustafa nâm hatun ile sulbiye sagīre kızı Rukiye’ye ve li-ebeveyn karındaşı İbrahim Efendi nâm kimesneye münhasıra olduğu lede’ş-şer‘ tahakkukundan sonra zâtı ta‘rîf-i şer‘î ile mu‘arrefe olan işbu sâhibetü’l-kitâb mezbûre Emine Hatun meclis-i şer‘-i şerîf-i enverde menzil-i âti’z-zikre bi’l-verâse vaz‘-ı yedi mütehakkık olan mezbûr İbrahim Efendi mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan Hasan Ağa b. Hüseyin menzili ve bir tarafdan Ali Bey b. Ali Çavuş menzili ve bir tarafdan Kuşakçı Ali Çavuş oğlu Mustafa menzili ve bir tarafdan tarîk-i âm ile mahdûd iki bâb tahtânî oda ve bir sofa ve kenîf ve bir mikdâr bağçeyi muhtevî mülk menzil zevcim müteveffâ-yı mezbûr el-Hâc Mustafa’nın hayatında yedinde mülkü olduğu hâlde menzil-i mezbûrun merkūm Ali Bey’in menzili cânibinden nısf-ı şâyi‘ini hayatında fevtinden üç gün mukaddem üç yüz guruşa bana bey‘ ve temlik ve ben dahi ber-vech-i muharrer iştirâ ve temellük ve kabûl eylediğimden sonra semeni olan meblağ-ı mezbûr üç yüz guruşu ceste ceste yedimden ahz ü kabz edip umûruna sarfla istihlâk eylediğini ikrâr ve işhâd dahi etmiş iken mezbûr İbrahim Efendi mecmû‘-ı menzil-i mezkûra terekeden olmak üzere vaz‘-ı yed ve beyne’l-verese iktisâm murâdımdır, suâl olunup nısf-ı menzil-i mezbûrda kasr-ı yedine tenbîh olunmak matlûbumdur dedikde gıbbe’s-suâl mezbûr İbrahim Efendi cevâbında fi’l-vâki‘ menzil-i mezbûre terekeden olmak üzere vaz‘-ı yedini ikrâr lâkin mâ‘adâyı inkâr etmeğin müdde‘iye-i mezbûreden müdde‘âsına mutâbıka beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre ahâlisinden Hasan Ağa b. Hüseyin ve es-Seyyid Mustafa Çelebi b. İbrahim ve Mustafa b. Ahmed nâm kimesneler zât-ı müdde‘iye-i mezbûreyi ârifân oldukları hâlde li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Mustafa b. Mehmed b. Süleyman nâm kimesne iki seneden beri maraz-ı müzmine mübtelâ olduğu hâlde hayatında fevtinden üç gün mukaddem yedinde mülkü olup mahalle-i mezbûrede vâki‘ bir tarafdan Hasan Ağa b. Hüseyin menzili bir tarafdan Ali Bey b. Ali Çavuş menzili ve bir tarafdan Kumaşçı Ali Çavuş oğlu Mustafa menzili ve bir tarafdan tarîk-i âm ile mahdûd iki bâb tahtânî oda ve bir sofa ve kenîf ve bir mikdâr bağçeyi muhtevî mülk menzilinin merkūm Ali Bey menzili cânibinden nısf-ı şâyi‘i [83a] zevcesi işbu müdde‘iye-i mezbûre Emine Hatun’a üç yüz guruşa bey‘ ve temlik ol dahi ber-vech-i muharrer iştirâ ve temellük ve kabûl edip semeni olan meblağ-ı mezbûr üç yüz guruşu ceste ceste zevcesi mezbûre yedinden ahz ü kabz ve umûruna harc ü sarf eylediğini ve menzil-i mezbûrun nısf-ı şâyi‘i zevcesi mezbûre Emine’nin mülk-i müşterâsı olduğu bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince nısf-ı menzil-i mezbûrdan merkūm İbrahim Efendi’nin kasr-ı yedine tenbîh birle mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene semânîn ve mi’e ve elf. Şühûdü’l-hâl: İmâm es-Seyyid Ahmed Efendi b. Mehmed, Ali Ağa b. Mustafa, Mehmed b. Ahmed, Molla Ali b. Halil, Baba Ali b. Mehmed, Osman Bey b. Musa ve gayruhum.