Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 503 Hüküm no: 579 Orijinal metin no: [83b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Abdullah’ın, hanımı Fatma’dan beş ay önce boşanmış olduğundan Fatma’yı eve davetinin kanunsuz olduğu İslâmbol’da İbrahim Çavuş mahallesinde sâkin el-Hâc Süleyman b. Abdullah nâm kimesne Davudpaşa Mahkemesi’nde meclis-i şer‘de zevce-i medhûlün-bihâsı olup zâtı mu‘arrefe olan Fatıma bt. Ahmed nâm Hatun mahzarında mezbûre Fatıma Hatun on beş guruş mehr-i müeccel tesmiyesiyle zevce-i medhûlün-bihâm iken bana mutâva‘atından ibâ ve benimle ezvâc mu‘âmelesinden imtinâ‘ eder deyü da‘vâ, mezbûre Fatıma Hatun dahi cevâbında ber-vech-i muharrer ikrâr lâkin târih-i i‘lâmdan beş ay mukaddem mehr-i mezkûr on beş guruş hakkım ile nafaka-i iddet-i ma‘lûme ve meûnet-i süknâm üzerlerine zevcim mezbûr ile hul‘ olduğumda ol dahi hul‘-ı mezbûru kabûl edip ol-vechile zevcim mezbûrdan mutallaka olmuş idim deyü ba‘de’d-def‘ ve’l-inkâr mezbûre Fatıma Hatun def‘-i mezkûrunu udûlden ve mahalle-i mezbûre ahâlisinden Hasan Beşe b. Mehmed ve Mustafa Beşe b. Ahmed, Mustafa Beşe b. Mehmed ve el-Hâc Ali Beşe b. İbrahim nâm kimesneler şehâdetleriyle mezbûr el-Hâc Süleyman muvâcehesinde isbât etmeğin mûcebiyle müdde‘î-i mezbûr el-Hâc Süleyman da‘vâ-yı mezkûresiyle mezbûre Fatıma Hatun’a bî-vech mu‘ârazadan men‘ olunduğu bi’l-iltimâs. Fî-Şevvâl sene 1196