Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 503 Hüküm no: 580 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden İsmail Efendi’nin borç verdiği Mustafa Hidayet Efendi’den fazla para istememesi Mahmiye-i İslâmbol’da Koca Mustafa Paşa kurbünde Canbaziye mahallesinde sâkin İsmail Efendi b. Mehmed Davudpaşa Mahkemesi’nde meclis-i şer‘-i hatîrde Mustafa Hidayet Efendi b. Mehmed mahzarında mezbûr Mustafa Hidayet Efendi bin yüz doksan senesi Şevvâli’l-mükerreminin on yedinci günü yedimden ve mâlımdan istidâne ve kabz eylediği altı yüz guruş deyni mukābelesinde merhûm Hacı Ahmed Efendi Vakfı müsakkafâtından mahalle-i mezbûrede kâin mutasarrıf olduğu bir bâb müfrez vakıf menzilini bâ-ma‘rifet-i mütevellî vefâen bana ferâğ ve tefvîz ve ben dahi ber-vech-i muharrer tefevvüz ve kabûl eyledikden sonra menzil-i mezkûru târih-i mezbûrdan beher şehir beş guruş ücret tesmiyesiyle yedimden istîcâr ve tesellüm ve kabûl etmiş idi. Hâlâ menzil-i mezkûru mezbûr Mustafa Hidayet Efendi’ye red birle meblağ-ı mezkûr altı yüz guruşu ve ücret-i müsemmâ-yı mezkûreden işbu târih-i i‘lâma gelince zimmetinde terâküm eden altı senelik üç yüz altmış guruş ki cem‘an dokuz yüz altmış guruşu mezbûr Mustafa Hidayet Efendi’den taleb ederim deyü ba‘de’d-da‘vâ ve’l-istintâk mezbûr Mustafa Hidayet Efendi cevâbında müdde‘î-i mezbûr İsmail Efendi’den ancak yüz guruş istidâne ve kabzını ve mukābelesinde menzil-i mezkûru ber-vech-i muharrer vefâen ferâğını ikrâr mâ‘adâ beş yüz guruş ile menzil-i mezkûru beher mâh beşer guruş ücret tesmiyesiyle istîcârını inkâr etmekle müdde‘î-i mezbûr İsmail Efendi ancak ziyâde beş yüz guruş müdde‘âsını beyândan ızhâr-ı acz ile ba‘de’l-istihlâf ve’t-tahlîf mûcebiyle müdde‘î-i mezbûr İsmail Efendi ziyâde beş yüz guruş müdde‘âsı içün mezbûr Mustafa Hidayet Efendi’ye bilâ-beyyine mu‘ârazadan ba‘de’l-men‘ mertebe-i ikrârı olan yüz guruşu müdde‘î-i mezbûr İsmail Efendi’ye edâya mezbûr Mustafa Hidayet Efendi’ye tenbîh ve ücret-i müsemmâ-yı mezkûr içün mezbûr İsmail Efendi beyâna havâle olunduğu bi’l-iltimâs huzûr-ı âlîlerine i‘lâm olundu. Fî 28 L sene 1196