Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 509 Hüküm no: 591 Orijinal metin no: [84b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdi’nin hizmetine karşılık olan parayı at hamalı Halil b. Yusuf’un ödemesi At hamalı tâifesinden Halil b. Yusuf nâm kimesne Davudpaşa Mahkemesi’nde meclis-i şer‘de yine tâife-i mezbûreden Mehmed b. Abdi nâm kimesne mahzarında bin yüz doksan beş senesi rûz-ı Kasım’ının onuncu günü mezbûr Mehmed’in taleb ve senevî kırk beş guruş ücret tesmiyesiyle târih-i i‘lâma gelince on ay mikdârı mezbûr Mehmed’e hizmetim sebk edip hâlâ fesh-i akd-i icâre etmekle müddet-i mezkûrede sebk eden ücret müsemmâsından şühûr-ı mezkûreye isâbet eden kırk bir guruş bir rub‘ alacak hakkımı mezbûr Mehmed’den hâlâ taleb ederim deyü ba‘de’d-da‘vâ ve’l-istintâk mezbûr Mehmed dahi cevâbında müdde‘î-i mezbûr Halil’in senede ancak kırk guruş ücret ile on ay mikdârı kendüye hizmetini ikrâr ziyâde beş guruş ile bir ay hizmetini inkâr etmeğin müdde‘î-i mezbûr Halil ancak ziyâde beş guruş müdde‘âsını beyândan ızhâr-ı acz edip talebiyle mezbûr Mehmed ba‘de’t-tahlîfi’ş-şer‘î mûcebince müdde‘î-i mezbûr Halil ziyâde beş guruş mutâlebesiyle mezbûr Mehmed’e bilâ-beyyine bî-vech mu‘ârazadan ba‘de’l-men‘ mâ‘adâ bir ay ziyâde hizmetini beyâna ba‘de’l-havâle mezbûr Mehmed’in mertebe-i ikrârı olan senevî meblağ kırk guruşdan on aya isâbet eden otuz üç guruş kırk akçeyi müdde‘î-i mezbûr Halil’e edâ ve teslîme mezbûr Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 9 Zilka‘de sene 1196