Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 513 Hüküm no: 601 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayazade Mehmed Efendi’nin koyun alışverişinden Kasap İbrahim’e olan borcunu ödemesi Sâhib-i arzuhâl Kasab İbrahim b. Mehmed nâm kimesne Davudpaşa Mahkemesi’nde meclis-i şer‘de derûn-ı arzuhâlde mezkûrü’l-ism Kayazâde Mehmed Efendi tarafından vech-i âtî üzere vekîl olduğu Hasan Çavuş Ağa b. Mustafa ve Mehmed Ağa b. Hüseyin nâm kimesneler şehâdetleriyle sâbit olan es-Seyyid Ahmed Ağa b. es-Seyyid Mustafa nâm kimesne mahzarında müvekkil-i mezbûr Mehmed Efendi bundan akdem işbu hâzır bi’l-meclis vekîlharcı Mehmed Ağa b. Ömer yediyle beheri altışar guruşa olmak üzere yedimden ve mâlımdan iştirâ ve kabz eylediği iki re’s koyun bahâsından müvekkil-i mezbûr Mehmed Efendi zimmetinde on iki guruş alacak hakkım olmağla meblağ-ı merkūm on iki guruşu müvekkil-i mezbûr Mehmed Efendi’den hâlâ taleb ederim deyü ba‘de’d-da‘vâ ve’l-istintâk vekîl-i mezbûr es-Seyyid Ahmed Ağa cevâbında ber-vech-i muharrer ikrâr lâkin müvekkil-i mezbûr Mehmed Efendi meblağ-ı mezbûr on iki guruşu yine târih-i mezbûrda mezbûr Mehmed Ağa yediyle müdde‘î-i mezbûr İbrahim’e tamamen edâ ve teslîm etmiş idi deyü ba‘de’d-def‘ ve’l-inkâr vekîl-i mezbûr es-Seyyid Ahmed Ağa def‘-i mezkûrunu beyândan âciz olup talebiyle mezbûr İbrahim ba‘de’t-tahlîfi’ş-şer‘î mûcebiyle müvekkil-i mezbûr Mehmed Efendi meblağ-ı mezbûr on iki guruşu müdde‘î-i mezbûr İbrahim’e edâ ve teslîm içün vekîli mezbûr es-Seyyid Ahmed Ağa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 27 min-Za sene 1196