Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 514 Hüküm no: 603 Orijinal metin no: [85b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veliyüddin b. İbrahim’in damadı İsa b. İbrahim’den alacağı olduğunu ispatlayamadığı İşbu bâ‘isü’l-i‘lâm Veliyüddin b. İbrahim nâm kimesne Davudpaşa Mahkemesi’nde meclis-i şer‘de kayınatası İsa b. İbrahim nâm kimesne mahzarında târih-i i‘lâmdan beş sene mukaddem vilâyet-i Anadolu’da Nevşehir kazâsına tâbi‘ Zile nâm karyede sâkine mezbûr İsa’nın kızı ve benim zevcem olan Şerife nâm hatuna bir bilezik ve bir sîm kuşak alıverip teslîm etmek üzere mezbûr İsa’ya mâlımdan otuz altı guruş def‘ ü teslîm ol dahi ber-vech-i muharrer yedimden ahz ü kabz edip lâkin [zikr] olunan bilezik ve kuşağı alıvermeyip meblağ-ı mezbûr otuz altı guruş zimmetinde kalmağla meblağ-ı mezbûr otuz altı guruş ile emlâkimden olup karye-i mezbûrede Ortalar ta‘bîr olunur nâm mahâlde vâki‘ ma‘lûmü’l-hudûd bir kıt‘a bağımın mahsûlünden beher yükü birer guruş kıymetli iki senede bi-gayrı hakkın ahz ve âhara bey‘ ile istihlâk eylediği yüz yük üzüm kıymeti olan yüz guruş ki cem‘an yüz otuz altı guruşu kayınatam mezbûr İsa’dan hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr Veliyüddin ber-vech-i muharrer müdde‘âsını beyândan ızhâr-ı acz edip talebiyle mezbûr İsa ba‘de’t-tahlîfi’ş-şer‘î mûcebiyle müdde‘î-i mezbûr Veliyüddin meblağ-ı mecmû‘-ı merkūm yüz otuz altı guruş da‘vâsıyla mezbûr İsa’ya bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm. Fî 27 Za sene 1196