Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 515 Hüküm no: 606 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah’ın Ali Efendi’de alacağı olduğunu ispatlayamadığı Vilâyet-i Anadolu’da Alaçam kazâsında tâbi‘ Yenice nâm karyede sâkine iken bundan akdem vefât eden Mehmed b. Ali nâm kimesnenin verâseti zevce-i metrûkesi Rabia bt. Hüseyin nâm hatun ile zevce-i uhrâsından mütevellid sulbî kebîr oğulları es-Seyyid Halil ve es-Seyyid İbrahim ve es-Seyyid Feyzullah nâm kimesnelere münhasıra oldukdan sonra sâhib-i arzuhâl mezbûr es-Seyyid Feyzullah Davudpaşa Mahkemesi’nde meclis-i şer‘de derûn-ı arzuhâlde mezkûrü’l-ism el-Hâc Ali Efendi b. Mehmed mahzarında târih-i i‘lâmdan dokuz sene mukaddem mezbûr el-Hâc Ali Efendi kazâ-i mezbûrede hâkim bulunmağla mezbûr el-Hâc Ali Efendi’nin nâibi olan Osman Efendi babam müteveffâ-yı mezbûrun terekesini mûceb-i tahrîri yoğiken mezbûr Osman Efendi tahrîr edip mezbûr el-Hâc Ali Efendi dahi babam müteveffâ-yı mezbûrun terekesinden olmak üzere karındaşım mezbûr Halil yedinden bi-gayrı hakkın resm nâmıyla altmış beş guruş ahz ü kabz etmekle meblağ-ı mezbûr altmış beş guruşdan benim hisseme isâbet eden on sekiz guruş otuz sekiz para on bir akçeyi mezbûr el-Hâc Ali Efendi’den geri taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr es-Seyyid Feyzullah ber-vech-i muharrer müdde‘âsını beyân edemeyip ba‘de’l-istihlâf ve’t-tahlîf mûcebiyle müdde‘î-i mezbûr es-Seyyid Feyzullah husûs-ı mezkûr içün mezbûr el-Hâc Ali Efendi’ye bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Bâkī ilâ-âhirihî. Fî 29 min-Zilka‘deti’ş-şerîfe sene 1196