Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 516 Hüküm no: 607 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enserci Kirkor’un Keresteci Avanes’ten aldığı kereste parasını ödemesi Mahmiye-i İslâmbol’da Davudpaşa İskelesi kurbünde mütemekkin Keresteci Avanes v. Yasef nâm zimmî Davudpaşa Mahkemesi’nde meclis-i şer‘de Enserci Kirkor v. Mardoros nâm zimmî muvâcehesinde merkūm Kirkor zimmî târih-i i‘lâmdan üç ay mukaddem yedimden ve mâlımdan iştirâ ve kabz eylediği ecnâs-ı kereste semeninden zimmetinde olan cem‘an yüz sekiz guruş on iki para alacak hakkımın elli guruşunu merkūm Kirkor zimmî yedinden ahz ü kabz edip elli sekiz guruş on iki parası zimmetinde bâkī kalmağla meblağ-ı bâkī-i merkūm elli sekiz guruş on iki parayı merkūm Kirkor zimmîden hâlâ taleb ederim deyü ba‘de’d-da‘vâ ve’l-istintâk merkūm Kirkor zimmî dahi cevâbında müdde‘î-i merkūmdan ancak yüz üç guruş ve on iki para kereste iştirâsını ikrâr ve müdde‘î-i merkūm kabzını mu‘terif olduğu elli guruşdan mâ‘adâ zimmetimde ancak elli üç guruş on iki para deynim bâkī kalmışdır deyü ziyâde beş guruşu ba‘de’l-inkâr müdde‘î-i merkūm ziyâde müdde‘âsını beyândan ızhâr-ı acz edip talebiyle merkūm Kirkor zimmîye yemîn teklif olundukda ol dahi yemînden nükûl etmeğin mûcebiyle meblağ-ı bâkī-i merkūm elli sekiz guruş on iki parayı müdde‘î-i merkūm Avanes zimmîye edâ ve teslîme merkūm Kirkor zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 4 Zilhicce sene 1196