Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 517 Hüküm no: 609 Orijinal metin no: [86a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peratmoz v. Lefter’in Kostandi v. Ligori’ye olan borcunu ödemesi İslâmbol’da el-Hâc Evhaddin mahallesinde kâin Ebûbekir Bey Bostanı demekle arîf bostanda mütemekkin bağçevân tâifesinden Kostandi v. Ligori nâm zimmî Davudpaşa Mahkemesi’nde meclis-i şer‘de yine tâife-i mezbûreden Peratmoz v. Lefter nâm zimmî muvâcehesinde bundan akdem merkūm zimmî zimmetinde yedimden istidâne ve kabz eylediği bâ-temessük otuz dört buçuk guruş alacak hakkımın dört guruşunu yedinden ahz ü kabz ve otuz buçuk guruşu zimmetinde bâkī kalıp hattâ târih-i i‘lâmdan sekiz gün mukaddem merkūm Peratmoz zimmî meblağ-ı bâkī-i merkūm otuz buçuk guruş bana deyni olduğunu şühûd mahzarında ikrâr dahi etmiş idi deyü ba‘de’d-da‘vâ ve’l-istintâk ve’l-inkâr müdde‘î-i merkūm Kostandi zimmî ber-vech-i muharrer merkūm Peratmoz zimmînin ikrâr-ı meşrûhunu şühûd-ı Nasârâdan Kiryako v. Kostandi ve Vasil v. Peratmoz nâm zimmîler şehâdetleriyle bi’l-muvâcehe ba‘de’l-isbât mûcebiyle meblağ-ı bâkī-i mezbûr otuz buçuk guruşu müdde‘î-i merkūm Kostandi zimmîye edâ ve teslîme merkūm Peratmoz zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 12 Z sene 1196