Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 522 Hüküm no: 622 Orijinal metin no: [87a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moşo v. Peratmoz’un Aftim v. Dimitri’yi alacağını tahsil etmek üzere vekil tayin ettiğini ispatlayamadığı Vilâyet-i Anadolu’da Niğde kazâsına tâbi‘ Dilmison nâm karye ahâlisinden olup mahmiye-i İslâmbol’da ( ) mahallesinde mütemekkin Moşo v. Peratmoz nâm zimmî Davudpaşa Mahkemesi’nde meclis-i şer‘de Aftim v. Dimitri nâm zimmî muvâcehesinde bundan akdem benim karye-i mezbûrede ma‘lûmü’l-esâmî zimmîler zimmetlerinde çobanlık ücretimden bâkī on sekiz guruş kıymetli üç keyl hıntamı zimmîyûn-ı mesfûrûndan ahza ve bana teslîme merkūm Aftim zimmîyi tevkîl eylediğimde merkūm Aftim zimmî dahi mârrü’z-zikr hıntayı ahz ve bana teslîm etmeyip istihlâk etmekle kıymet-i mezkûresi olan on sekiz guruşu merkūm Aftim zimmîden taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm Moşo zimmî ber-vech-i muharrer müdde‘âsını beyândan âciz olmağın talebiyle merkūm Aftim zimmî ba‘de’t-tahlîfi’ş-şer‘î mûcebiyle müdde‘î-i merkūm Moşo zimmî da‘vâ-yı mezkûresiyle merkūm Aftim zimmîye bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 25 Zilhicce sene 1196