Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 523 Hüküm no: 623 Orijinal metin no: [87a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veled-i Karabaş mahallesinden Emine bt. Abdullah’ın Fatma bt. Hasan’dan alacağı konusunda anlaşma sağlandığı Mahmiye-i İslâmbol’da Veled-i Karabaş mahallesinde sâkine ve zâtı mu‘arrefe Emine bt. Abdullah nâm Hatun Davudpaşa Mahkemesi’nde meclis-i şer‘de Fatıma bt. Hasan nâm Hatun’un sadrî kebîr oğlu ve tarafından sâbitü’l-vekâle vekîli olan İsmail b. el-Hâc Abdullah nâm kimesne mahzarında müvekkile-i mezbûre Fatıma Hatun bin yüz doksan dört senesi Rebî‘ülevveli gurresinde yedimden istidâne ve kabz eylediği yüz kırk guruş deyni mukābelesinde taht-ı tasarrufunda olup Silahdâr-ı esbak merhûm Abdurrahman Ağa Vakfı müsakkafâtından olan mahmiye-i mezbûrede Seyyid Ömer mahallesinde vâki‘ ma‘lûmü’l-hudûd ve’l-müştemilât bir bâb vakıf menzilini bâ-ma‘rifet-i mütevellî bana vefâen ferâğ ve tefvîz ve ben dahi ber-vech-i muharrer tefevvüz ve kabûl etmiş idim. Hâlâ menzil-i mezkûru müvekkile-i mezbûreye geri ferâğ birle meblağ-ı mezbûru bana teslîme tenbîh olunmak matlûbumdur deyü eylediği da‘vâsından bâ-vesâtet-i muslihîn müvekkile-i mezbûre ile yüz guruş üzerine sulh olup mâ‘adâ kırk guruşa müte‘allika âmme-i da‘vâdan müvekkile-i mezbûrenin zimmetini ibrâ ve ıskāt eyledikde vekîl-i mezbûr dahi müvekkilem mezbûre meblağ-ı merkūm içün müdde‘iye-i mezbûreye ribh nâmıyla elli üç guruş vermiş idi deyü bi’l-vekâle tesaddî eylediği da‘vâsından meccânen fâriğ olup meblağ-ı merkūm elli üç guruşa müte‘allika da‘vâdan müdde‘iye-i mezbûrenin zimmetini bi’l-vekâle ibrâ ve ıskāt edip her biri ber-minvâl-i muharrer âharın sulh ve ibrâsını ba‘de’l-kabûl müdde‘iye-i mezbûre Emine Hatun bedel-i sulh-ı merkūm yüz guruşu dahi târih-i i‘lâmdan dört ay tamamında kendüye edâ etmek üzere müvekkile-i mezbûre Fatıma Hatun’u bi’r-rızâ imhâl eyledikde ol dahi müddet-i mehl-i merkūm tamamında edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 26 Zilhicce sene 1196