Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 524 Hüküm no: 625 Orijinal metin no: [87a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’den boşanan Musa’nın, mehri taksitle ödemesi İslâmbol’da el-Hâc Hamza mahallesinde sâkine ve zâtı mu‘arrefe Âişe bt. Mehmed nâm hatun Davudpaşa Mahkemesi’nde meclis-i şer‘de zevc-i mutallıkı Musa b. Şaban mahzarında mezbûr Musa zevc-i dâhilim olduğu hâlde târih-i i‘lâm günü tatlîk etmekle zimmetinde ma‘kūdun-aleyh olan otuz üç guruş kırk akçe hakkımın sekiz guruş kırk akçesiyle nafaka-i iddet-i ma‘lûme ve meûnet-i süknâm içün beynimizde ta‘yîn olunan beş guruş ki cem‘an on üç guruş kırk akçeden meccânen fâriğa olup mutâlebesine müte‘allika da‘vâdan zevc-i mutallıkım mezbûrun zimmetini ibrâ ve ıskāt eylediğimde ol dahi ibrâmı kabûl eyledikden sonra mehr-i müeccelimin bâkīsi olan yirmi beş guruşu zevc-i mutallıkım mezbûr Musa’dan hâlâ taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı bâkī mehr-i mezkûr yirmi beş guruşun edâsıyla mezbûr Musa ba‘de’l-ilzâm müdde‘iye-i mezbûre Âişe Hatun meblağ-ı bâkī mehr-i mezkûr yirmi beş guruşu târih-i i‘lâmdan beher mâh beşer guruşdan cem‘an beş ay tamamında kendüye edâ etmek üzere mezbûr Musa’yı bi’r-rızâ imhâl eyledikde ol dahi müddet-i mezkûre tamamında edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî-gurreti Muharremi’l-harâm sene 1197