Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 523 Hüküm no: 624 Orijinal metin no: [87a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Hüseyin’in koyun etinden Kasap İbrahim’e olan borcunu ödemesi Kasab tâifesinden İbrahim b. Mehmed nâm kimesne Davudpaşa Mahkemesi’nde meclis-i şer‘de Kömürcü Hüseyin b. el-Hâc Ömer nâm kimesne mahzarında mezbûr Hüseyin bundan akdem yedimden ve mâlımdan iştirâ ve kabz eylediği lahm-ı ganem semeninden zimmetinde otuz guruş hakkım olup hattâ meblağ-ı mezbûr otuz guruş cihet-i merkūmeden zimmetinde bana deyni olduğunu müş‘ir yedime bir kıt‘a temessük dahi i‘tâ etmiş idi deyü bir kıt‘a temessük ibrâzıyla meblağ-ı merkūm otuz guruşu mezbûr Hüseyin’den ba‘de’d-da‘vâ ve’l-istintâk mezbûr Hüseyin dahi ber-vech-i muharrer ikrâr ve i‘tirâf etmeğin mûcebiyle meblağ-ı mezbûr otuz guruşun edâsıyla mezbûr Hüseyin ilzâm olunduğu bi’l-iltimâs huzûr-ı âlîlerine i‘lâm olundu. Fî 2 M sene 1197