Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 525 Hüküm no: 627 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Ali’nin keten bezlerini çırpmak için alıp kaybeden Ayşe bt. Hüseyin’in bunu tazmin edeceği Zâtı mu‘arrefe olan Fatıma bt. Ali nâm hatun Davudpaşa Mahkemesi’nde meclis-i şer‘de yine mu‘arrefetü’z-zât Âişe bt. Hüseyin nâm kassâre mahzarında emlâkimden olup otuz guruş kıymetli yirmi dokuz buçuk zirâ‘ ketan bezimi çırpmak içün bundan akdem mezbûre Âişe Hatun’a def‘ ü teslîm edip ol dahi yedimden ba‘de’l-ahz ve’l-kabz mezbûre Âişe Hatun zikr olunan bezi âhar mahalle vaz‘ ve ol-vechile te‘addîsinden nâşi zâyi‘ etmekle kıymet-i mezkûresi olan otuz guruşu mezbûre Âişe Hatun’dan hâlâ taleb ederim deyü eylediği da‘vâsından bâ-vesâtet-i muslihîn mezbûre Âişe Hatun ile on sekiz guruş üzerine sulh olup zikr olunan beze kıymete ve bi’l-cümle husûs-ı mezkûra müte‘allika da‘vâdan mezbûre Âişe Hatun’un zimmetini ibrâ ve ıskāt eyledikde ol dahi sulh ve ibrâsını ba‘de’l-kabûl bedel-i sulh-ı merkūm on sekiz guruşu müdde‘iye-i mezbûre Fatıma Hatun’a bi’t-taleb edâ ve teslîme mezbûre Âişe Hatun’a tenbîh olunduğu bi’l-iltimâs huzûr-ı âlîlerine i‘lâm olundu. Fî 4 Muharrem sene 1197