Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 526 Hüküm no: 630 Orijinal metin no: [87b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Ahmed’in Hasan Çavuş’un ev işlerinde çalışması karşılığı olan ücretini aldığı Sâhib-i arzuhâl Osman b. Ahmed nâm şâbb-ı emred-i bâliğ Davudpaşa Mahkemesi’nde meclis-i şer‘de li-ebeveyn ammisi olup derûn-ı arzuhâlde mezkûrü’l-ism olan Hasan Çavuş Ağa b. Mehmed nâm kimesne mahzarında bundan akdem ammim mezbûr Hasan Çavuş Ağa beni yanına alıp ba‘zı menzili hizmetinde istihdâm ve benim dahi târih-i i‘lâma gelince altı sene mikdârı mezbûr Hasan Çavuş Ağa’ya hizmetim sebk etmekle mezbûr Hasan Çavuş Ağa sinîn-i mezkûrede sebk eden hizmetimin ecr-i misli mukābelesinde mâlından mukaddemâ nakid on guruş ve hâlâ on guruş ki cem‘an yirmi guruş ile bir iplik alacası entari ve bir kalavra ve bir kalpak ve bir aba ve bir kuşağını bana def‘ ü teslîm ve ben dahi bi-a‘yânihâ tamamen ahz ü kabz edip sinîn-i mezkûrede sebk eden hizmetimin ecr-i misline ve bi’l-cümle husûs-ı mezkûra müte‘allika âmme-i da‘vâdan mezbûr Hasan Çavuş Ağa ile zevcesi gāibe ani’l-meclis Ümmügülsüm bt. Mustafa nâm hatundan her birinin zimmetlerini ibrâ ve ıskāt eylediğimde onlar dahi ibrâmı kabûl eylediler deyü tarafeynin ikrâr ve tasdîkleri ba‘de’t-tescîl ve mübâşirleri el-Hâc Ömer Çavuş kulları iltimâsıyla huzûr-ı âlîlerine i‘lâm olundu. Fî 7 Muharrem sene 1197