Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 526 Hüküm no: 629 Orijinal metin no: [87b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin çubukçu dükkânındaki eşyalarını önce Mehmed’e satıp sonra ona teslim etmeden başkasına sattığından aldığı parayı Mehmed’e geri ödemesi Bâ‘isü’l-i‘lâm Mehmed b. Ali nâm kimesne Davudpaşa Mahkemesi’nde meclis-i şer‘de diğer Mehmed b. Ali nâm kimesne mahzarında bundan akdem mezbûr diğer Mehmed emlâkinden mahmiye-i İslâmbol’da ( ) mahallesinde kâin bir bâb çubukçu dükkânı derûnunda mevcûd gedik ta‘bîr olunan eşyâ-i mütenevvi‘a-i ma‘lûmesini otuz guruş semen-i makbûza bana bey‘ ve temlik ben dahi iştirâ ve temellük ve kabûl edip lâkin eşyâ-i mezbûreyi bana kable’t-teslîm âhara bey‘le istihlâk etmekle medfû‘um semen-i merkūm otuz guruşu mezbûr diğer Mehmed’den geri taleb ederim deyü da‘vâ etdikde ol dahi cevâbında ber-vech-i muharrer bey‘ini ve müdde‘î-i mezbûr yedinden ancak on guruş ahzını ve kable’t-teslîm âhara bey‘le istihlâkini ikrâr ziyâde yirmi guruşu inkâr etmeğin müdde‘î-i mezbûr Mehmed ber-vech-i muharrer ziyâde müdde‘âsını beyândan ızhâr-ı acz edip talebiyle mezbûr diğer Mehmed ba‘de’t-tahlîfi’ş-şer‘î mûcebiyle müdde‘î-i mezbûr Mehmed ziyâde yirmi guruş mutâlebesiyle mezbûr diğer Mehmed’e bilâ-beyyine bî-vech mu‘ârazadan ba‘de’l-men‘ mertebe-i ikrârı olan on guruşu mezbûr Mehmed’e redd ü teslîme diğer Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 4 Muharrem sene 1197