Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 260 Hüküm no: 215 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık Efendi ile Mehmed Efendi arasındaki ayıplı köle davası Ma‘rûz, Sâhib-i arzuhâl Mehmed Sadık Efendi b. el-Hâc Ali nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde Asâkir-i Hâssa-i Şâhâne livâ kâtibi derûn-ı arzuhâlde mezkûrü’l-ism es-Seyyid Ahmed Efendi b. Mehmed muvâcehesinde ben işbu târîh-i i‘lâmdan yirmi dört gün mukaddem gāib ani’l-meclis Esirci Ömer Ağa vesâtetiyle cemî‘ uyûbdan sâlime olmak üzere merkūm es-Seyyid Ahmed Efendi’nin yedinde malı olup işbu meclis-i ma‘kūd-ı mezkûrda mu‘âyene olunan bir re’s zenciye câriyesini cemî‘ uyûbdan [60b] sâlime olmak üzere bin sekiz yüz guruş semen-i medfû‘ ve makbûza iştirâ ve kabz etmiş idim. El-hâletü hâzihî hâmiş-i arzuhâlde mastûr sudûr-ı i‘zâmdan ser-etibbâ-yı hazret-i cihân-dârî fazîletlü semâhatlü Abdülhak Efendi hazretlerinin bir kıt‘a i‘lâmları mantûkunca câriye-i mezbûre rîh-i tayyâr illetiyle mu‘ayyeb ve ayb-ı mezkûr şirâ târîhine nazaran kadîm ve inde’t-tüccâr noksân-ı semen îcâb eder uyûbdan olmağla câriye-i mezkûreyi yedimden ahz birle semen-i mezkûr bin sekiz yüz guruşu bana redd ü teslîme merkūm es-Seyyid Ahmed Efendi’ye tenbîh olunmak matlûbumdur deyü teveccüh-i husûmet bulundukdan sonra da‘vâ etdikde ol dahi cevâbında câriye-i mezkûreyi ol mikdâr semen-i makbûza müdde‘î-i merkūma ber-minvâl-i muharrer cemî‘ uyûbdan sâlime olmak üzere bey‘ini ikrâr, lâkin ayb-ı mezkûrun kıdemini inkâr etmekle müdde‘î-i merkūm ber-vech-i muharrer müdde‘âsına ikāmet-i beyyine edemeyip bi’t-taleb merkūm es-Seyyid Ahmed Efendi bi’l-muvâcehe vech-i şer‘î üzere tahlîf olunmağın mûcebince müdde‘î-i mezbûr Mehmed Sadık Efendi da‘vâ-yı mezkûresiyle merkūm es-Seyyid Ahmed Efendi’ye bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. Fî 15 R sene [12]57.