Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 259 Hüküm no: 214 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hüseyin’in mehr-i muaccelini ödemesi hususunda eşine tenbih olunması Ma‘rûz, Medîne-i Üsküdar’da Dorbalı [Torbalı] mahallesinde sâkine sâhibe-i arzuhâl mu‘arrefetü’z-zât Şerife Emine Hanım bt. es-Seyyid Hüseyin Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde hâlâ zevci derûn-ı arzuhâlde mezkûrü’l-ism Osman Efendi b. Süleyman nâm kimesne muvâcehesinde ben bundan akdem nefsimi bin bir guruş mehr-i mu‘accel ve bin guruş mehr-i müeccel tesmiyeleriyle mezbûr Osman Efendi’ye tezvîc ve tenkîh eylediğimde, ol dahi tezevvüc ve duhûl edip lâkin mehr-i mu‘accel-i mezkûrum olan bin bir guruşu zevcim mezbûr henüz bana edâ ve îfâ etmemekle suâl olunup mehr-i mu‘accel-i mezkûr bin guruşu bana edâya zevcim mezbûra tenbîh olunmak matlûbumdur deyü da‘vâ etdikde, ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince mehr-i mu‘accel-i mezkûr bin bir guruşu zevcesi müdde‘iyye-i mezbûre Şerife Emine Hatun’a edâya mezbûr Osman Efendi’ye tenbîh olunduğu huzûr-ı âlîlerine i‘lâm olundu. Fî 19 R sene [12]57.