Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 533 Hüküm no: 645 Orijinal metin no: [89a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük torununa bakan Fatma bt. Abdullah’a damadı Mustafa’nın nafakayı ödemesi Zâtı mu‘arrefe olan Fatıma bt. Abdullah nâm hatun Davudpaşa Mahkemesi’nde meclis-i şer‘de sâbıkā dâmâdı el-Hâc Mustafa b. İbrahim nâm kimesne mahzarında dâmâdım mezbûr el-Hâc Mustafa’nın firâşından hâsıla ve sadriye kızım Zeliha bt. Mehmed nâm hatundan mütevellide Âişe nâm sagīre kızım mezbûre Zeliha Hatun’un hacr u terbiyesinde iken kızım mezbûre nefsini sagīre-i mezbûre ecnebîye mütezevvice olmağla hakk-ı hıdâne kendüden sâkıt ve hâlâ benim hacr u terbiyemde olan sagīre-i mezbûrenin nafaka ve kisvesi içün beynimizde terâzî eylediğimiz küllü yevm on dörder akçeden bin yüz doksan altı senesi Ramazani’l-mübârekinin gurresinden târih-i i‘lâm şehri gāyetine gelince dâmâdım mezbûr el-Hâc Mustafa zimmetinde terâküm eden on yedi buçuk guruşun altı buçuk guruşunu dâmâdım mezbûr yedinden ahz ü kabz ve on guruşu zimmetinde bâkī kalmağla hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i mezbûr on bir guruşu müdde‘iye-i mezbûre Fatıma Hatun’a edâ ve teslîme mezbûr el-Hâc Mustafa’ya tenbîh olunduğu bi’l-iltimâs huzûr-ı âlîlerine i‘lâm olundu. Bâkī emr ü fermân hazret-i men-lehü’l-emrindir. Fî 28 min-Muharremi’l-harâm sene 1197