Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 261 Hüküm no: 217 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın bağ, menzil ve bazı eşya satışı davasının Pirluganda kadılığınca görüşülmesi Ma‘rûz, Sâdır olan fermân-ı âlîlerine imtisâlen istid‘â ve derkenâra nazar [olundukda] Anadolu’da Pirluganda (Taşkent) kazâsına muzâfe Kaplanlı karyesi sâkinlerinden Mustafa b. Abdullah nâm kimesne yeri arz-ı mîrî ve kürûmu mülkü olan Karaburun ve Yassıdam nâm mahâlde kâin her biri lede’l-ahâlî ve’l-cîrân ma‘lûmü’l-hudûd bağlarının yerleri ile mevâzi‘-i adîdede vâki‘ kezâlik her biri lede’l-ahâlî ve’l-cîrân ma‘lûmü’l-hudûd ve’l-kıt‘a tarlalarını bâ-tapu izn-i sâhib-i arzla ashâb-ı arzuhâl Mehmed ve Ahmed ve Abdullah ebnâ-i Reşid nâm kimesnelere ferâğ etdikden sonra kürûm-ı mezkûra ve bir göz mülk menzili ile yedinde emvâli olan bir leğen ve tencere ve on re’s sağılır ağnâm ve bir re’s merkep ve üç pekmez küpü ve bir kazma, balta ve bir kazgan ve bir saban demirini dahi iki yüz elli dört senesi Recebi’l-müreccebi’nin on beşinci günü târîhiyle müverraha yedlerinde olan mümzâ ve mahtûm bir kıt‘a hüccet-i şer‘iyye nâtıka olduğu üzere hibe-i sahîha-i şer‘iyye ile yine mezbûrûn Mehmed ve Ahmed ve Abdullah’a ma‘an hibe ve teslîm etdikde onlar dahi ber-vech-i muharrer ba‘de’l-ittihâb ve’l-kabûl hibenin ıvazında merkūm Mustafa’ya müşterek mâllarından elli guruş def‘ ü teslîm eylediklerinde ol dahi kabûl ve kabz edip ol vechile emvâl-i muharrere-i mezkûre merkūmûnun emvâl-i mevhûbeleri olup mâni‘-i rücû‘ bulunarak müdâhale îcâb etmez iken merkūm Mustafa’yı karye-i mezbûre ahâlîsinden Abdurrahman nâm kimesne tahrîk etmekden nâşî merkūm Mustafa hibesinden rücû‘ birle emvâl-i mevhûbe-i mezkûreyi geri ahz murâdıyla bundan akdemce mahâllinde lede’t-terâfu‘ merkūm Mustafa’nın da‘vâsı bî-vech olmağla şer‘an iltifât olunmayıp mu‘ârazadan men‘ olunmuş ise de mücâb ve mülzem olmadığı ecilden yine müdâhaleden hâlî olmadığından bahisle bi’z-zât kendüleri yâhud taraflarından nasb u ta‘yîn eyledikleri vekîl-i şer‘îleri merkūm Mustafa ile mahâllinde bi’l-muvâcehe terâfu‘ olunmaları bâbında kazâ-i mezbûr muhassılı ve nâibine hitâben bir kıt‘a emr-i âlîşân sudûrunu istirhâm eyledikleri arzuhâlleri meâlinden ve bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dairede bi’l-istintâk şifâhen eyledikleri takrîrlerinden müstebân olmağla bu sûretde ber-vefk-i istid‘â emr-i âlîşân sudûru re’y-i âlîlerine menût mevâddan idüğü huzûr-ı âlîlerine i‘lâm olundu. Fî 25 R sene [12]57.