Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 262 Hüküm no: 218 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi v. Yani’ye borcunu ödemesi için tenbihte bulunulması Ma‘rûz, Arzuhâl eden Kostandi v. Yani nâm zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde medîne-i Üsküdar’a muzâfe Çengel karyesinde mütemekkin arabacı tâifesinden derûn-ı arzuhâlde mastûrü’l-ism Todori v. Dimitri nâm zimmî muvâcehesinde mersûm Todori zimmî zimmetinde bin iki yüz elli altı senesi şehr-i Ramazani’l-mübârekinin on beşinci günü malımdan ve yedimden iktirâz ve kabz ve umûruna sarfla istihlâk eylediği bin beş yüz guruş alacak hakkım olmağla meblağ-ı mezkûr bin beş yüz guruşu mersûm Todori zimmîden hâlâ taleb ederim deyü da‘vâ etdikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince meblağ-ı mezkûr bin beş yüz guruşun müdde‘î-i mesfûr Kostandi zimmîye edâ ve teslîmiyle mersûm Todori zimmî ilzâm olunduğu huzûr-ı âlîlerine i‘lâm olundu. Fî-gurreti Ra sene [12]57.