Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 539 Hüküm no: 657 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Halil’in oturduğu evin on iki senelik kirasını Yusuf mahallesi avarız vakfı mütevellisine ödemesi İslâmbol’da Yusuf mahallesinde sâkin mahalle-i mezbûre avârızı vakfının mütevellîsi sâhib-i arzuhâl es-Seyyid el-Hâc Mehmed Zeynelabidin Efendi b. eş-Şeyh es-Seyyid Halil Efendi Davudpaşa Mahkemesi’nde meclis-i şer‘de derûn-ı arzuhâlde mezkûretü’l-ism zâtı mu‘arrefe Emine bt. Halil nâm hatun mahzarında vakf-ı merkūm müsakkafâtından olup mahalle-i mezbûrede vâki‘ ma‘lûmü’l-hudûd bir bâb vakıf menzil beher şehr otuzar akçe icâre-i müeccele ile mezbûre Emine Hatun’un bi’l-icâreteyn taht-ı tasarrufunda olmağla bin yüz seksen beş senesi Muharremi gurresinden doksan altı senesi Zilhicce gāyetine gelince on iki senede menzil-i mezkûr icâresinden zimmetinde müctemi‘ otuz altı guruşu bi’t-tevliye mezbûre Emine Hatun’dan hâlâ taleb ederim deyü da‘vâ etdikde ol dahi ber-vech-i muharrer ikrâr ve i‘tirâf etmeğin mûcebince meblağ-ı mezbûr otuz altı guruşun edâsıyla mezbûre Emine Hatun’a ilzâm olunduğu bi’l-iltimâs huzûr-ı âlîlerine i‘lâm olundu. Fî 13 S sene 1197