Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 542 Hüküm no: 664 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Ali Ağa’nın küçük oğlu Abid’e Ahmed b. Osman’ın livâta fiili işlediğini ispatlayamadığı İslâmbol’da Koca Mustafa Paşa mahallesinde sâkin Âbid nâm sagīrin babası ve velîsi Ali Ağa nâm kimesne Davudpaşa Mahkemesi’nde meclis-i şer‘de Ahmed b. Osman nâm şâbb-ı emred ve bâliğ mahzarında mezbûr Ahmed târih-i i‘lâmdan yedi gün mukaddem oğlum sagīr-i mezbûr Âbid’e livâta fi‘lini etmekle mûcib-i şer‘îsini mezbûr Ahmed’den bi’l-velâye hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr Ali Ağa ber-vech-i muharrer müdde‘âsını isbât edemeyip husûs-ı mezkûrede mezbûr Ahmed’e yemîn dahi teveccüh etmemekle müdde‘î-i mezbûr Ali Ağa da‘vâ-yı mezkûresiyle mezbûr Ahmed’e bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 min-S sene 1197